ലാലിഗയില്‍ ബാഴ്‌സലോണയുടെ ലയണല്‍ മെസി ശത്രുവായിരുന്നോ എന്ന ചോദ്യത്തിനു നീണ്ട ഇടവേളയ്‌ക്കു ശേഷം ക്രിസ്‌റ്റ്യാനോ റൊണാള്‍ഡോ മറുപടി പറഞ്ഞു.
ബാഴ്‌സയുടെ ബദ്ധവൈരികളായ റയല്‍ മാഡ്രിഡില്‍ നിന്നും ഇറ്റാലിയന്‍ ക്ലബ്ബായ യുവന്റസിലേക്ക് ചേക്കേറിയതിനു പിന്നാലെയാണ് ആരാധകര്‍ എന്നും ഉന്നയിച്ചിരുന്ന ചോദ്യത്തിനു റൊണോ ഉത്തരം നല്‍കിയത്.
“മെസി എനിക്ക് ഒരിക്കലും എതിരാളി ആയിരുന്നില്ല. അദ്ദേഹത്തെ മാത്രമല്ല ഒരു താരത്തെയും ഞാന്‍ അങ്ങനെ കാണാറില്ല. സ്വന്തം ടീമിനായി പൊരുതാനാണ് ഏതു കളിക്കാരനും ശ്രമിക്കുക. അതു തന്നെയാണ് ഞാനും മെസിയും ചെയ്‌തിട്ടുള്ളത്“ - എന്നും റൊണാള്‍ഡോ വ്യക്തമാക്കി.
സ്‌പോര്‍ട്ടിംഗിലും, മാഞ്ചസ്റ്ററിലും, റയലിലും കളിച്ചപ്പോള്‍ ആ ടീമുകള്‍ക്കായി മികച്ച പ്രകടനം പുറത്തെടുത്തു. മെസിയും അതേ പാതയിലാണുള്ളത്. എന്നാലും ഞങ്ങളില്‍ ആരാണ് കേമന്‍ എന്ന ചോദ്യമാകും എല്ലാ കോണുകളില്‍ നിന്നുമുണ്ടാകുകയെന്നും റൊണാള്‍ഡോ കൂട്ടിച്ചേര്‍ത്തു.
യുവന്റസില്‍ എത്തിയ ശേഷമാണ് റൊണാള്‍ഡോ ഇക്കാര്യങ്ങള്‍ വ്യക്തമാക്കിയത്.