ജില്ലയില്‍ ഞായറാഴ്ച വീണ്ടും സമ്പര്‍ക്ക രോഗികളുടെ എണ്ണം നൂറ് കടന്നു. ഇന്നലെ ആകെ 133 പേര്‍ക്കാണ് രോഗം സ്ഥിരീകരിച്ചത്. ഇതില്‍ സമ്പര്‍ക്ക രോഗികള്‍ 122 ആണ്. ഒരു മാസം മുന്‍പ് ജൂലൈ 22 ന് 133 പേര്‍ക്ക് കോവിഡ് സ്ഥിരീകരിച്ചിരുന്നു. പിന്നീട് ജൂലൈ 24 നും രോഗബാധിതര്‍ 133 ല്‍ എത്തി. ജില്ലയില്‍ 133 ആണ് ഒരു ദിവസത്തെ രോഗം സ്ഥിരീകരിക്കുന്നവരുടെ എറ്റവും ഉയര്‍ന്ന എണ്ണം. ജൂലൈ 23 നും രോഗികള്‍ എണ്ണത്തില്‍ നൂറ് കടന്നിരുന്നു, 106 പേര്‍.
ഇന്നലെ വിദേശത്ത് നിന്ന് വന്ന 4 പേര്‍ക്കും ഇതരസംസ്ഥാനത്ത് നിന്നുമെത്തിയ 4 പേര്‍ക്കും 3 ആരോഗ്യപ്രവര്‍ത്തകര്‍ക്കും രോഗം സ്ഥിരീകരിച്ചു. 22 പേര്‍ രോഗമുക്തി നേടി. തിരുവനന്തപുരം മെഡിക്കല്‍ കോളേജില്‍ ക്യാന്‍സര്‍ ചികിത്സയിലിരിക്കെ ആഗസ്റ്റ് 20 ന് മരണമടഞ്ഞ അഞ്ചല്‍ സ്വദേശി ദിനമണിയുടെ (75) മരണം കോവിഡ് മൂലമാണെന്ന് സ്ഥിരീകരിച്ചു.
