Ali Khamenei: ഇസ്രായേലിന്റെ വിധി അവര്‍ തീരുമാനിച്ചിരിക്കുന്നു, കയ്‌പ്പേറിയതും വേദനാജനകവുമായ അനുഭവമുണ്ടാകും, അവര്‍ക്കത് ലഭിച്ചിരിക്കും: ആയത്തുള്ള ഖമേനി

ഇറാനില്‍ കനത്ത നാശം വിതച്ച ഇസ്രായേലിന് ശക്തമായ മറുപടി നല്‍കുമെന്ന് ഇറാന്റെ പരമോന്നത നേതാവ് ആയത്തോള്ള അലി ഖമേനി. ഇസ്രായേല്‍ സ്വയം കയ്‌പേറിയതും വേദനാജനകവുമായ അതിന്റെ വിധി നിര്‍ണയിച്ചിരിക്കുകയാണെന്നും അത് അവര്‍ക്ക് ലഭിച്ചിരിക്കുമെന്നും ഖമേനി വ്യക്തമാക്കി. വെള്ളിയാഴ്ച രാത്രിയില്‍ ഇസ്രായേല്‍ നടത്തിയ ആക്രമണത്തില്‍ ഇറാന്‍ ഇസ്ലാമിക റെവലൂഷന്‍ ഗാര്‍ഡ് കോര്‍പ്‌സ് മേധാവി മേജര്‍ ജനറല്‍ ഹൊസൈന്‍ സലാമി അടക്കം കൊല്ലപ്പെട്ടിരുന്നു. ഇതിന് പിന്നാലെയാണ് ഇറാന്റെ ആദ്യ ഔദ്യോഗിക പ്രതികരണം.

മഹത്തായ ഇറാനിയന്‍ ജനതയ്ക്ക് എന്ന് പറഞ്ഞുകൊണ്ടാണ് ഖമേനിയുടെ സന്ദേശം ആരംഭിക്കുന്നത്. സയണിസ്റ്റ് ഭരണകൂടം അതിന്റെ ദുഷിച്ചതും രക്തരൂക്ഷിതവുമായ കരങ്ങളാല്‍ നമ്മുടെ രാജ്യത്ത് ഒരു കുറ്റകൃത്യം നടത്തി. താമസസ്ഥലങ്ങളടക്കം ആക്രമിച്ചതിലൂടെ ഇസ്രായേല്‍ തങ്ങളുടെ യഥാര്‍ഥ മുഖം വെളിപ്പെടുത്തി. ഇതിനുള്ള കടുത്ത പ്രതികരണം ഇസ്രായേല്‍ കാത്തിരിക്കണം. ആയത്തൊള്ള ഖമേനി പറഞ്ഞു. ഇസ്രായേല്‍ ആക്രമണത്തില്‍ ഇറാന്റെ ഉന്നത സൈനിക ഉദ്യോഗസ്ഥരും ആണവ ശാസ്ത്രജ്ഞരും കൊല്ലപ്പെട്ടെന്നും ഖമേനി അറിയിച്ചു.

 ഈ കുറ്റകൃത്യത്തിലൂടെ സയണിസ്റ്റ് ഭരണകൂടം കയ്‌പേറിയതും വേദനനിറഞ്ഞതുമായ വിധി സ്വയം നിര്‍ണയിച്ചുകഴിഞ്ഞു. അവര്‍ക്ക് ആ വിധി ലഭിച്ചിരിക്കുമെന്നും ഖമേനി പറഞ്ഞു. അതേസമയം അമേരിക്കന്‍ പിന്തുണയോടെയാണ് ഇറാനെതിരായ ഇസ്രായേല്‍ ആക്രമണമെന്നും ഇറാന്‍ ആരോപിച്ചു. എന്നാല്‍ ഈ ആരോപണം യു എസ് തള്ളികളഞ്ഞു.