മുന്‍‌കാമുകിയുടെ വീടിന്‍റെ തട്ടിന്‍‌പുറത്ത് യുവാവ് ആഴ്ചകളോളം ഒളിച്ചിരുന്നു‍, ഇപ്പോള്‍ ഭവനഭേദനത്തിന് കേസ്!

മുന്‍‌കാമുകിയുടെ വീടിന്‍റെ തട്ടിന്‍‌പുറത്ത് ആഴ്ചകളോളം ഒളിച്ചിരുന്ന യുവാവിനെതിരെ ഭവനഭേദനത്തിന് കേസ്. കാരി മൈക്കേല്‍ കൊക്കൂസി(31) എന്ന യുവാവാണ് മുന്‍ കാമുകിയുടെ ബെഡ്‌റൂമിന്‍റെ തട്ടിന്‍‌പുറത്തുനിന്ന് പൊലീസ് പിടിയിലായത്.

കൊക്കൂസിയുടെ ഉപദ്രവം കാരണം മുന്‍ കാമുകി പൊലീസില്‍ നേരത്തേ പരാതിപ്പെട്ടിരുന്നു. ആ പരാതി പൊലീസ് അന്വേഷിച്ചുവരവേയാണ് കൊക്കൂസിയെ പരാതിക്കാരിയുടെ വീട്ടില്‍ നിന്നുതന്നെ പിടികൂടിയത്.

തന്‍റെ വീടിനുള്ളില്‍ താനല്ലാതെ മറ്റാരോ ഉണ്ടെന്ന തോന്നല്‍ കുറച്ചുദിവസങ്ങളായി യുവതിക്ക് ഉണ്ടായിരുന്നു. എന്നാല്‍ അത് വെറും തോന്നലാണെന്നായിരുന്നു കരുതിയത്. പക്ഷേ, ആരുടേയോ പുതപ്പ് ഇതിനിടെ വീട്ടില്‍ കണ്ടതോടെ യുവതിക്ക് ആശങ്കയായി. തുടര്‍ന്ന് നടത്തിയ തിരച്ചിലിലാണ് മുന്‍ കാമുകനായ കാരി മൈക്കേല്‍ കൊക്കൂസിയെ തട്ടിന്‍‌പുറത്തുനിന്ന് പിടികൂടിയത്.

യുവതിയും മുന്‍‌കാമുകനും തമ്മില്‍ പിടിവലിയുണ്ടാവുകയും യുവതി നിലവിളിക്കുകയും ചെയ്തതോടെ അയല്‍ക്കാര്‍ ഓടിക്കൂടി. അവര്‍ ഫോണ്‍ ചെയ്താണ് പൊലീസിനെ വരുത്തിയത്. കഴിഞ്ഞ രണ്ടാഴ്ചയിലേറെയായി കൊക്കൂസി യുവതിയുടെ വീടിന്‍റെ തട്ടിന്‍‌പുറത്തുണ്ടായിരുന്നു എന്നാണ് പൊലീസ് വെളിപ്പെടുത്തിയത്.