18 വയസിന് താഴെ നടത്തുന്ന വിവാഹങ്ങൾക്കെതിരെ കർശന നടപടികളുമായി സൗദി അറേബ്യ. ഇത്തരം സംഭവങ്ങൾ ശ്രദ്ധയിൽ പെട്ടാൽ ശിശുസംരക്ഷണ നിയമപ്രകാരം ആവശ്യമായ നിയമനടപടികൾ സ്വീകരിക്കണമെന്ന് ആവശ്യപ്പെട്ട് സൗദി നീതി മന്ത്രി ഡോ; വലീദ് ബിൻ മുഹമ്മദ് അൽ സമ്മാനി കോടതികൾക്ക് നിർദേശം നൽകി.
18വയസ്സിന് താഴെയുള്ളവരുടെ വിവാഹ ഉടമ്പടികൾ നടത്തരുതെന്ന് ആവശ്യപ്പെട്ട് ബന്ധപ്പെട്ട ഉദ്യോഗസ്ഥർക്കും നിർദേശങ്ങൾ നൽകിയിട്ടുണ്ട്. നിയമം ആൺകുട്ടികൾക്കും പെൺകുട്ടികൾക്കും ഒരേ പോലെ ബാധകമാണ്. ഇത്തരം കേസുകൾ ശ്രദ്ധയിൽ പെട്ടാൽ ഉചിതമായ കോടതികളിലേക്ക് റഫർ ചെയ്യണമെന്നും മന്ത്രി കോടതികൾക്കും ഉദ്യോഗസ്ഥർക്കും നൽകിയ നിർദേശത്തിൽ പറയുന്നു.
പ്രായപൂർത്തിയാകാത്തവരുടെ വിവാഹങ്ങൾക്ക് ഈ വർഷം സൗദി ഷൂറാ കൗൺസിൽ നിരോധനം ഏർപ്പെടുത്തിയിരുന്നു.