42-ാം വയസില്‍ ഒരു പൂതി; ഐപിഎല്‍ താരലേലത്തിനു രജിസ്റ്റര്‍ ചെയ്ത് ആന്‍ഡേഴ്‌സണ്‍
രാജ്യാന്തര ക്രിക്കറ്റില്‍ ശ്രദ്ധ കേന്ദ്രീകരിക്കുന്നതിന്റെ ഭാഗമായാണ് ആന്‍ഡേഴ്‌സണ്‍ ഇതുവരെ ഐപിഎല്‍ കളിക്കാതിരുന്നത്
ഇംഗ്ലണ്ട് ക്രിക്കറ്റ് ടീം മുന്‍ പേസര്‍ ജെയിംസ് ആന്‍ഡേഴ്‌സണ്‍ ഐപിഎല്‍ താരലേലത്തിനു രജിസ്റ്റര്‍ ചെയ്തു. 42 കാരനായ ആന്‍ഡേഴ്‌സണ്‍ ആദ്യമായാണ് ഐപിഎല്‍ കളിക്കാന്‍ ആഗ്രഹം പ്രകടിപ്പിക്കുന്നത്. കഴിഞ്ഞ ജൂലൈയിലാണ് ആന്‍ഡേഴ്‌സണ്‍ രാജ്യാന്തര ക്രിക്കറ്റില്‍ നിന്ന് വിരമിച്ചത്.
രാജ്യാന്തര ക്രിക്കറ്റില്‍ ശ്രദ്ധ കേന്ദ്രീകരിക്കുന്നതിന്റെ ഭാഗമായാണ് ആന്‍ഡേഴ്‌സണ്‍ ഇതുവരെ ഐപിഎല്‍ കളിക്കാതിരുന്നത്. രാജ്യാന്തര കരിയര്‍ അവസാനിപ്പിച്ചതിനാലാണ് ഇപ്പോള്‍ ഐപിഎല്ലിനായി ആന്‍ഡേഴ്‌സണ്‍ രജിസ്റ്റര്‍ ചെയ്തിരിക്കുന്നത്. 1.25 കോടി അടിസ്ഥാന വിലയിട്ടാണ് ആന്‍ഡേഴ്‌സണിന്റെ രജിസ്‌ട്രേഷന്‍.
കരിയറില്‍ ഇതുവരെ 44 ട്വന്റി 20 മത്സരങ്ങള്‍ മാത്രമാണ് ആന്‍ഡേഴ്‌സണ്‍ കളിച്ചിട്ടുള്ളത്. അതില്‍ ഇംഗ്ലണ്ടിനായി കളിച്ചത് വെറും 19 കളികള്‍ മാത്രം.
നവംബര് 24, 25 ദിവസങ്ങളിലായി നടക്കുന്ന ഐപിഎല്‍ താരലേലത്തിലേക്ക് 1574 താരങ്ങള്‍ രജിസ്റ്റര്‍ ചെയ്തിട്ടുണ്ട്. അതില്‍ 1,165 പേരും ഇന്ത്യന്‍ താരങ്ങളാണ്.
