ഇന്ത്യൻ പ്രീമിയർ ലീഗിൽ തുടർച്ചയായ മൂന്നാം തോൽവി വഴങ്ങി നിതീഷ് റാണ നയിക്കുന്ന കൊൽക്കത്ത നൈറ്റ് റൈഡേഴ്സ്. പോയൻ്റ് പട്ടികയിൽ ഏറ്റവും അവസാനം നിൽക്കുന്ന ഡൽഹി ക്യാപ്പിറ്റൽസുമായാണ് കൊൽക്കത്ത പരാജയപ്പെട്ടത്. ഇതോടെ അഞ്ച് തോൽവികൾക്ക് ശേഷം ഡൽഹി സീസണിലെ തങ്ങളുടെ ആദ്യ വിജയം സ്വന്തമാക്കി. അതേസമയം മത്സരശേഷം തോൽവിയുടെ ഉത്തരവാദിത്വം താൻ ഏൽക്കുന്നതായി കൊൽക്കത്ത നായകൻ നിതീഷ് റാണ വ്യക്തമാക്കി.
ബാറ്റിംഗ് ദുഷ്കരമായ പിച്ചിൽ 15-20 റൺസ് കുറവാണ് ഞങ്ങൾ നേടിയത്. അതിൻ്റെ ഉത്തരവാദിത്വം ഞാൻ ഏറ്റെടുക്കുന്നു. ഞാൻ ക്രീസിൽ തന്നെ കാലുറപ്പിച്ച് നിൽക്കേണ്ടതായിരുന്നു. ഞങ്ങളുടെ ബൗളർമാർ മികച്ച രീതിയിലാണ് പന്തെറിഞ്ഞത്. ഡൽഹിയുടെ സ്കോറിംഗ് കുറയ്ക്കാൻ ശ്രമിച്ചെങ്കിലും ഞങ്ങൾക്ക് സാധിച്ചില്ല. ബൗളിംഗിൽ ഈ പ്രകടനം തന്നെ തുടർ മത്സരങ്ങളിലും പാലിക്കേണ്ടതുണ്ട്. ടീം എന്ന നിലയിൽ കൂടുതൽ ഒത്തിണക്കം കൂടി കാണിക്കാനായാൽ മികച്ച പ്രകടനം നടത്താനാകുമെന്നും കൊൽക്കത്ത നായകൻ വ്യക്തമാക്കി.
മത്സരത്തിൽ ടോസ് നഷ്ടമായി ആദ്യം ബാറ്റിംഗിനിറങ്ങിയ കൊൽക്കത്ത 128 റൺസ് വിജയലക്ഷ്യമാണ് ഡൽഹിക്ക് മുന്നിൽ വെച്ചത്. ഈ വിജയലക്ഷ്യം 19.2 ഓവറിൽ ആറ് വിക്കറ്റ് നഷ്ടത്തിലാണ് ഡൽഹി മറികടന്നത്. 41 പന്തിൽ 57 റൺസുമായി നായകൻ ഡേവിഡ് വാർണറാണ് ഡൽഹിക്ക് വേണ്ടി തിളങ്ങിയത്. 43 റൺസെടുത്ത ഓപ്പണർ ജേസൺ റോയിയാണ് കൊൽക്കത്തയുടെ ടോപ് സ്കോറർ.
