ഫാന്‍സി ഷോട്ടുകള്‍ ഞാന്‍ കളിക്കാറില്ല, ടെസ്റ്റ് ചാമ്പ്യന്‍ഷിപ്പ് വരാനിരിക്കുന്നു, എന്റെ ടെക്‌നിക്കുകള്‍ നന്നാക്കുന്നതില്‍ മാത്രമാണ് ശ്രദ്ധ: കോലി

ഐപിഎല്ലില്‍ സണ്‍റൈസേഴ്‌സ് ഹൈദരാബാദിനെ തകര്‍ത്ത് റോയല്‍ ചലഞ്ചേഴ്‌സ് ബാംഗ്ലൂര്‍ പ്ലേ ഓഫ് സാധ്യതകള്‍ നിലനിര്‍ത്തിയപ്പോള്‍ ഐപിഎല്ലിലെ തന്റെ ആറാം സെഞ്ചുറി കണ്ടെത്തിയ വിരാട് കോലിയാണ് കളിയിലെ താരമായത്. റണ്‍സ് കണ്ടെത്തുന്നുണ്ടെങ്കിലും പതിയെ തുടങ്ങി കത്തിക്കയറുന്ന കോലിയുടെ ബാറ്റിംഗ് സമീപനത്തിനെതിരെ വിമര്‍ശനങ്ങള്‍ ഉയരുന്നതിനിടെയാണ് താരം 63 പന്തില്‍ നിന്നും 100 റണ്‍സെടുത്തത്. 12 ബൗണ്ടറിയും 4 സിക്‌സും അടങ്ങുന്നതായിരുന്നു കോലിയുടെ ഇന്നിങ്ങ്‌സ്.

മത്സരശേഷം സ്‌െ്രെടക്ക്‌റേറ്റിനെ പറ്റിയുള്ള വിമര്‍ശനങ്ങളെ പറ്റിയുള്ള അവതാരകന്റെ ചോദ്യത്തിന് അതൊന്നും താന്‍ ശ്രദ്ധിക്കാറില്ലെന്നായിരുന്നു കോലി നല്‍കിയ മറുപടി. പുറത്തുനില്‍ക്കുന്നവര്‍ എന്ത് പറയുന്നുവെന്ന് ഞാന്‍ ശ്രദ്ധിക്കാറില്ല. ആദ്യ പന്ത് മുതല്‍ അടിച്ച് കളിക്കാനാണ് എപ്പോഴും ശ്രമിക്കാറുള്ളത്. കഴിഞ്ഞ ചില മത്സരങ്ങളില്‍ അതിന് ഇടിവ് തട്ടിയുട്ടുണ്ടാകാമെങ്കിലും ശരിയായ സമയത്ത് മികച്ച പ്രകടനം നടത്താനായി.

ഞാന്‍ ഫാന്‍സി ഷോട്ടുകള്‍ കളിച്ച് വിക്കറ്റ് നഷ്ടപ്പെടുത്താന്‍ ഇഷ്ടപ്പെടുന്നില്ല. എന്റെ രീതിയും അതല്ല.എന്റെ ടെക്‌നിക്കില്‍ വിശ്വസിച്ച് കളിക്കുന്നതാണ് എനിക്കിഷ്ടം. ഇപ്പോള്‍ കളിക്കുന്നത് ഐപിഎല്ലിലാണെങ്കിലും ഇത് കഴിഞ്ഞയുടനെ കളിക്കേണ്ടത് ടെസ്റ്റിലാണ്. അതിനാല്‍ എന്റെ ടെക്‌നിക്കില്‍ വിശ്വസിച്ച് കളിക്കാനാണ് ഞാന്‍ ഇഷ്ടപ്പെടുന്നത്. കോലി പറഞ്ഞു.