പത്ത് മാസം കാത്തിരിക്കു, നമ്മുക്ക് സ്വന്തമായി 18,000 ജിപിയു ഉണ്ട്, ഇന്ത്യൻ സംസ്കാരം വിളിച്ചോതുന്ന എ ഐ ഉടനെ വരും: അശ്വിനി വൈഷ്ണവ്

ചൈനീസ് എ ഐ ആയ ഡീപ് സീക് ആഗോളവിപണിയെ തന്നെ ഞെട്ടിച്ചതാണ് ഇപ്പോള്‍ ലോകമാകെ ചര്‍ച്ചാവിഷയം. ഭാവിയുടെ ടെക്‌നോളജിയായി എ ഐ വാഴ്ത്തപ്പെടുമ്പോഴും പ്രധാനമായും അമേരിക്കന്‍ കമ്പനികള്‍ മാത്രമാണ് ഇതുവരെ മത്സരരംഗത്തുണ്ടായിരുന്നത്. എന്നാല്‍ അമേരിക്കന്‍ ടെക്‌നോളജി കുറഞ്ഞ ചെലവില്‍ മറികടക്കുന്നതായിരുന്നു ചൈന അവതരിപ്പിച്ച പുതിയ എ ഐ പ്ലാറ്റ്‌ഫോം. ഇപ്പോഴിതാ ഇന്ത്യയില്‍ നിന്നും വൈകാതെ എ ഐ പ്ലാറ്റ്‌ഫോം ഉണ്ടാകുമെന്ന സൂചന നല്‍കിയിരിക്കുകയാണ് കേന്ദ്ര ഐടി മന്ത്രിയായ അശ്വിനി വൈഷ്ണവ്.

സ്വന്തമായി ലാര്‍ജ് ലാംഗ്വേജ് മോഡല്‍(എല്‍ എല്‍ എം) വികസിപ്പിച്ചുകൊണ്ട് ഇന്ത്യയും എ ഐ രംഗത്ത് മുന്നേറ്റത്തിനൊരുങ്ങുകയാണെന്നാണ് കേന്ദ്രമന്ത്രി വ്യക്തമാക്കിയത്. 10 മാസത്തിനകം ചാറ്റ് ജിപിടിക്കും ഡീപ് സീക്കിനും സമാനമായി ഇന്ത്യയില്‍ നിന്നും എ ഐ മോഡലുണ്ടാകുമെന്നും എ ഐ മേഖലയില്‍ സ്വയം പര്യാപ്തതയെന്ന ലക്ഷ്യത്തിലേക്ക് വലിയൊരു നാഴികകല്ലാകും ഇതെന്നും അശ്വിനി വൈഷ്ണവ് പറഞ്ഞു.

 കഴിഞ്ഞ ഒന്നരവര്‍ഷമായി സ്റ്റാര്‍ട്ടപ്പുകള്‍, ഗവേഷകര്‍, പ്രഫസര്‍മാര്‍ തുടങ്ങിയവരുമായി ചേര്‍ന്ന് പ്രവര്‍ത്തിക്കുകയാണ്. നമ്മുടെ മൗലികമായ ലാംഗ്വേജ് മോഡല്‍ വികസിപ്പിക്കാനുള്ള ശ്രമങ്ങളിലാണ്. ഇന്ത്യയുടെ പശ്ചാത്തലം,ഭാഷ,സംസ്‌കാരം എന്നിവയെല്ലാം പരിഗണിക്കുന്ന മോഡലായിരിക്കും ഇത്. ഉത്കര്‍ഷ് ഒഡീഷ കോണ്‍ക്ലേവില്‍ സംസാരിക്കവെ അശ്വിനി വൈഷ്ണവ് പറഞ്ഞു.

എ ഐ അടിസ്ഥാന സൗകര്യങ്ങള്‍ക്കായി 10,000 ജിപിയു സ്വന്തമാക്കുക എന്ന ലക്ഷ്യം രാജ്യം മറികടന്നുകഴിഞ്ഞു. 18,600 ജിപിയുകള്‍ ഇന്ത്യയ്ക്കുണ്ട്. എന്‍വിഡിയയുടെ എച്ച് 100, എച്ച് 200 ജിപിയുകളാണ് ഭൂരിഭാഗവും. ഒപ്പം എ എം ഡിയുടെ എം ഐ 325 ജിപിയുകളുമുണ്ട്. ഡീപ് സീക് 2,500 ജിപിയുകള്‍ ഉപയോഗിച്ചാണ് പരിശീലനം നേടിയത്. ചാറ്റ് ജിപിടി 25,00 എണ്ണമാണ് ഉപയ്പ്പ്ഗിച്ചത്. ഇന്ത്യ 15,000ത്തിലേറെ ഹൈ എന്‍ഡ് ജിപിയുകളാണ് ഇതേ കാര്യത്തിനായി ഉപയോഗിക്കുന്നത്. ഇത് എ ഐ മത്സരത്തില്‍ ഇന്ത്യയെ ശക്തമായ നിലയിലെത്തിക്കും. ഇന്ത്യയുടെ തദ്ദേശീയമായ എ ഐ മോഡലുകളുടെ ആദ്യ പതിപ്പ് 4- 10 മാസങ്ങള്‍ക്കുള്ളില്‍ പുറത്തിറങ്ങും. അശ്വിനി വൈഷ്ണവ് പറഞ്ഞു.