എകെജിയെ ബാലപീഡകനെന്ന് വിശേഷിപ്പിച്ച വി ടി ബൽറാം എം എൽ എയ്ക്ക് പരിഹാസരൂപേണ നന്ദി പറഞ്ഞ് ചിന്ത പബ്ലിക്കേഷൻസ്. പുതിയ വിവാദങ്ങൾ ഉടലെടുത്തതോടെ എകെ ഗോപാലൻ എന്ന ശക്തമായ നേതാവിനെ കൂടുതലായി അറിയുന്നതിന് നിരവധി പേരാണ് എകെജിയുടെ ആത്മകഥയും ജീവചരിത്രവുമെല്ലാം വാങ്ങിയത്.
വിപണിയിൽ ഇപ്പോഴും എകെജിയുടെ ആത്മകഥയ്ക്ക് ആവശ്യക്കാർ ഏറുന്നുവെന്ന് പ്രസാധകർ പറയുന്നു. ദേശാഭിമാനിയുടെ പബ്ലിഷിംഗ് വിഭാഗമായ ചിന്തയാണ് എന്റെ ജീവിതകഥയുടെ പ്രസാധകര്‍. ആത്മകഥയെ അടിസ്ഥാനമാക്കിയായിരുന്നു ബലറാംഎകെജിക്കെതിരെ വിവാദപരാമര്‍ശം നടത്തിയത്. അതിനാല്‍ അദ്ദേഹത്തിന്റെ ആത്മകഥയായ ‘എന്റെ ജീവിതകഥ’ വന്‍തോതിലാണ് കഴിഞ്ഞ ദിവസങ്ങളില്‍ വിറ്റഴിച്ചത്.
ബലറാമിന്റെ പരാമര്‍ശങ്ങളും അതേതുടര്‍ന്നുണ്ടായ വിവാദങ്ങളും ദേശീയമാധ്യമങ്ങളും വാര്‍ത്തയാക്കിയതോടെ ലോക്‌സഭയിലെ ആദ്യപ്രതിപക്ഷനേതാവ് കൂടിയായിരുന്ന എകെജിയുടെ ജീവിതമെന്തെന്നറിയാന്‍ കേരളത്തിനു പുറത്തുള്ളവരും താത്പര്യപ്പെടുന്നുവെന്നാണ് ചിന്തയുടെ പ്രതിനിധികള്‍ വ്യക്തമാക്കുന്നത്. എകെജിക്കെതിരായ വിവാദ പരാമര്‍ശങ്ങളുടെ പേരില്‍ വിമർശനങ്ങൾ ഏറ്റുവാങ്ങിയ ആളായിരുന്നു വിടി ബൽറാം.