സംസ്ഥാനത്ത് ലോക്ക്ഡൗൺ നിർദേശങ്ങൾ ലംഘിച്ച് ജുമാ നമസ്‌കാരം സംഘടിപ്പിച്ചതിനെ തുടർന്ന് കോട്ടയം ഈരാറ്റുപേട്ടയിൽ 23 പേരെ അറസ്റ്റ് ചെയ്‌തു. ഈരാറ്റുപേട്ട തന്മയ സ്കൂളിൽ നിന്നാണ് ഇവരെ അറസ്റ്റ് ചെയ്തത്. സ്‌കൂൾ മാനേജരെയും അറസ്റ്റ് ചെയ്‌തിട്ടുണ്ട്.
കൊല്ലം പരവൂരിലും ലോക്ക്ഡൗൺ നിർദേശം ലംഘിച്ച് പള്ളിയിൽ നമസ്‌കാരം നടത്തിയതിന് അഞ്ചുപേർക്കെതിരെ പരവൂർ പോലീസ് കേസെടുത്തിട്ടുണ്ട്.കൊച്ചിയിൽ സർക്കാർ നിർദേശം ലംഘിച്ച് പള്ളിയിൽ പ്രാർത്ഥന നടത്തിയതിന് വികാരിയുൾപ്പടെ ആറ് പേർക്കെതിരെ കേസെടുത്തിട്ടുണ്ട്.
കൊവിഡ് 19 ജാഗ്രതയുടേയും മുൻകരുതലിന്‍റെയും പശ്ചാത്തലത്തിൽ ആളുകൂടുന്ന ചടങ്ങുകളും പ്രാര്‍ത്ഥനകളും ഒഴിവാക്കണമെന്ന് സർക്കാരിന്റെ കർശന നിർദേശം നിലവിലുള്ളപ്പോളാണ് ഒറ്റപ്പെട്ട ഇത്തരം കൂട്ടംചേരലുകൾ.
