രാജ്യത്ത് ജനങ്ങളെ പറ്റി ചിന്തിക്കുന്ന പാർട്ടി ബിജെപി മാത്രം, ലോക്‌സഭാ തെരഞ്ഞടുപ്പില്‍ കേരളത്തില്‍ അക്കൌണ്ട് തുറക്കും: സ്മൃതി ഇറാനി

വരുന്ന ലോക്‌സഭാ തെരഞ്ഞടുപ്പില്‍ കേരളത്തില്‍ ബിജെപി അക്കൗണ്ട് തുറക്കുമെന്ന് കേന്ദ്രമന്ത്രി സ്മൃതി ഇറാനി. കേരളത്തിന്റെ നല്ല ഭാവിക്കായാണ് ബി.ജെ.പി നടത്തുന്ന പരിവര്‍ത്തന്‍ യാത്രയെന്നും പരിവര്‍ത്തന്‍ യാത്രയുടെ മധ്യമേഖലാ യാത്ര ഉദ്ഘാടനം ചെയ്യവേ സ്മൃതി ഇറാനി പറഞ്ഞു.

‘രാജ്യത്ത് ജനങ്ങളെ പറ്റി ചിന്തിക്കുന്ന ഒരു പാര്‍ട്ടിയേയുള്ളു. അത് ബി.ജെ.പിയാണെന്ന് ജനങ്ങള്‍ക്കറിയാം. അധികാരത്തിലെത്തിയാല്‍ ജനങ്ങളെ വഞ്ചിക്കുന്ന പാര്‍ട്ടിയല്ല ബി.ജെ.പി. എന്നാല്‍ മറ്റുപാര്‍ട്ടികള്‍ അങ്ങനെയല്ല. കോണ്‍ഗ്രസ് ജനങ്ങള്‍ക്കിടയില്‍ ആശയക്കുഴപ്പം സൃഷ്ടിക്കുകയാണ്. ഒരു സാധാരണക്കാരന്റെ മകനാണ് ഇന്ന് രാജ്യം ഭരിക്കുന്നത്’ സ്മൃതി ഇറാനി പറഞ്ഞു.

സ്വന്തം പാര്‍ട്ടിക്കാരെ കൊന്ന സിപിഐഎമ്മുമായി കോണ്‍ഗ്രസിന് എങ്ങനെ കൈകോര്‍ക്കാന്‍ കഴിയുന്നുവെന്നും കേന്ദ്രമന്ത്രി ചോദിച്ചു. പ്രധാനമന്ത്രി നരേന്ദ്ര മോദി ലോകത്തിന് ഇന്ത്യന്‍ സേനയുടെ കരുത്ത് കാട്ടിക്കൊടുത്തു. പാകിസ്ഥാനില്‍ കയറി ഉള്ള അക്രമം ഇതിനു തെളിവാണ്. തീവ്രവാദത്തിന് ചുട്ട മറുപടി കൊടുക്കുമ്പോള്‍ കോണ്‍ഗ്രസ് രാജ്യത്ത് ആശയക്കുഴപ്പം സൃഷ്ടിക്കുകയാണെന്നും സ്മൃതി ഇറാനി പറഞ്ഞു.