പിൻസീറ്റിൽ ഇരുന്നയാൾ ഹെൽമറ്റ് വെച്ചില്ലെന്ന് കാണിച്ച് കാർ ഉടമയ്ക്ക് നോട്ടീസ് അയച്ച് പൊലീസ്. തിരുവനന്തപുരം വെമ്പായം സ്വദേശി രജനീകാന്തിന് പോലീസ് നോട്ടീസ് ലഭിച്ചത്. നോട്ടീസിൽ വലിയ അമ്പരപ്പാണ് കാർ ഉടമയ്ക്ക് ഉണ്ടായത്.കാറോടിക്കുമ്പോൾ ഇനി ഹെൽമറ്റും വെയ്ക്കണോ എന ചോദ്യമാണ് രജനീകാന്ത് ചോദിക്കുന്നത്. 500 രൂപയാണ് പിഴ.
ഹെൽമറ്റില്ലാത്തയാളെ പിൻസീറ്റിലിരുത്തി കാർ ഓടിച്ചെന്നും വിവരം കൺട്രോൾ റൂമിൽ സന്ദേശമായി ലഭിച്ചന്നുമാണ്.KL21L0147 എന്ന നമ്പറിലുള്ള കാറിന്റെ ഉടമയാണ് രജനീകാന്ത്. ശ്രീകാര്യം ചെക്കാലമൂട് നടന്ന സംഭവമാണിതെന്ന് കാണിച്ചാണ് നോട്ടീസ്. നോട്ടീസിൽ പറയുന്ന സമയത്ത് യാത്രക്കാരനായ രജനീകാന്ത് ഈ വഴി കടന്ന് പോയിട്ടുണ്ട്.
നോട്ടീസ് കിട്ടി 30 ദിവസത്തിനകം നേരിട്ടോ ചെല്ലാൻ വഴിയോ ഏതെങ്കിലും എസ്.ബി.ഐ. ബ്രാഞ്ചില്‍ ഫൈൻ അടയ്ക്കണം. ഇല്ലാത്തപക്ഷം കോടതിനടപടി നേരിടേണ്ടിവരുമെന്ന് നോട്ടീസിൽ പറയുന്നു. ഇതിനെ തുടർന്ന് കൺട്രോൾ റൂമിൽ രജനീകാന്ത് പരാതി അറിയിച്ചപ്പോൾ ഡിജിറ്റൽ നമ്പർ മാറിപ്പോയതാണ് എന്നായിരുന്നു പോലീസ് മറുപടി നൽകിയത്. പിഴ അടയ്ക്കേണ്ടതില്ലെന്നും നോട്ടീസ് കീറി കളയാനും പോലീസ് തന്നെ പറയുകയായിരുന്നു.
