ആലപ്പുഴ: പോസ്റ്റ് ഓഫീസ് നിക്ഷേപമായി പൊതുജനത്തിൽ നിന്ന് ശേഖരിച്ച 21 ലക്ഷം വെട്ടിച്ച വനിതാ പോസ്റ്റ് മാസ്റ്റർ അറസ്റ്റിലായി.മാരാരിക്കുളം വടക്ക് പോസ്റ്റ് ഓഫീസിലെ ഗ്രാമീൺ ഡാക്ക് സേവക് പള്ളിപ്പുറം പാമ്പുംതറയിൽ അനിതാ നാഥിനെ (29) യാണ് പോലീസ് അറസ്റ്റ് ചെയ്തത്.
മാരാരിക്കുളം പൊലീസാണ് ഇവരെ അറസ്റ്റ് ചെയ്തത്. നിക്ഷേപകരിൽ നിന്ന് പണം സ്വീകരിച്ചശേഷം വ്യാജ രസീത് നൽകും. തുടർന്ന് വ്യാജ പാസ്സ്ബുക്കിൽ തുകയും പതിച്ചു നൽകുന്നതായിരുന്നു ഇവരുടെ രീതി. 20000 രൂപയ്ക്ക് മേൽ ശമ്പളമുള്ള ഇവർ ഈ തുക ആർഭാട ജീവിതത്തിനു ചെലവാക്കുകയായിരുന്നു.
ഇവർക്കെതിരെ ഇരുപതിലധികം പരാതികൾ മാരാരിക്കുളം പോലീസിൽ എത്തിയതോടെ നടത്തിയ അന്വേഷണത്തിലാണ് വെട്ടിപ്പ് കണ്ടെത്തിയത്. മാരാരിക്കുളം സി.ഐ എ.വി.ബിജുവിന്റെ നേതൃത്വത്തിലുള്ള പോലീസ് സംഘമാണ് കേസ് അന്വേഷിക്കുന്നത്.
