സംസ്ഥാനത്ത് പബ്ബുകൾ വരുന്നുവെന്ന സൂചന നൽകി മുഖ്യമന്ത്രി പിണറായി വിജയൻ. നാം മുന്നോട്ട് എന്ന മുഖ്യമന്ത്രിയുടെ പ്രതിവാര പരിപാടിയിലാണ് കേരളത്തിൽ പബ്ബുകൾ വരുന്നുവെന്ന് സൂചന നൽകികൊണ്ട് മുഖ്യമന്ത്രി സംസാരിച്ചത്.
കേരളത്തിൽ രാത്രിയും പകലുമായി ജോലി ചെയ്യുന്ന ഐ ടി പോലുള്ള തൊഴിൽമേഖലകളിൽ പോലെയുള്ളവർക്ക് ജോലിക്ക് ശേഷം അല്പം ഉല്ലസിക്കണമെന്ന് തോന്നിയാൽ കേരളത്തിൽ അതിനായുള്ള സൗകര്യങ്ങളില്ലെന്ന് പരാതിയുണ്ട്. ഇത്തരത്തിലുള്ള ആക്ഷേപങ്ങൾ സർക്കാറിന് മുൻപിലുണ്ട്. അതുകൊണ്ട് തന്നെ ഈ പ്രശ്നങ്ങൾക്ക് പരിഹാരം കാണേണ്ടതിനെ പറ്റി സർക്കാർ ഗൗരവകരമായി ആലോചനയിലാണെന്നും മുഖ്യമന്ത്രി വ്യക്തമാക്കി.
ബെവ്റേജസ് വില്‍പ്പന ശാലകളിൽ നിന്നും വരി നിന്ന് ബുദ്ധിമുട്ടുന്നത് ഒഴിവാക്കുന്നതിനായി നല്ല രീതിയിൽ സജ്ജീകരിച്ചിരിക്കുന്ന കടകളിൽ നിന്നും സാധനങ്ങൾ നോക്കി വാങ്ങാവുന്ന തരത്തിൽ ഒരു സംവിധാനം കൊണ്ടുവരുന്നതിനേ പറ്റിയും ആലോചനയുണ്ടെന്ന് മറ്റൊരു ചൊദ്യത്തിനുള്ള മറുപടിയായി മുഖ്യമന്ത്രി പറഞ്ഞു.
കേരളത്തിൽ മധ്യവർജന പ്രവർത്തനങ്ങൾ നല്ല രീതിയിൽ നടന്നുവരികയാണെന്നും അദ്ദേഹം കൂട്ടിചേർത്തു.