സംസ്ഥാനത്ത് ശക്തമായ മഴ തുടരുന്ന സാഹചര്യത്തില്‍ അരുവിക്കര ഡാമിന്റെ 1- 5 വരെയുള്ള ഷട്ടറുകള്‍ ഉയര്‍ത്തുമെന്ന് ജില്ലാ ഭരണകൂടം അറിയിച്ചു. ഡാമിന്റെ വൃഷ്ടിപ്രദേശങ്ങളിലും സമീപ പ്രദേശങ്ങളിലും ജലനിരപ്പ് കൂടുന്ന സാഹചര്യത്തിലാണ് ഈ നടപടി.
ഇന്ന് (മെയ് 27) ഉച്ചയ്ക്ക് 2 മണിക്ക് അരുവിക്കര ഡാമിലെ 1 മുതല്‍ 5 വരെയുള്ള ഷട്ടറുകള്‍ ഓരോന്നും 20 സെന്റിമീറ്റര്‍ വീതം കൂടി ഉയര്‍ത്തും. ഇതോടെ ആകെ ഉയര്‍ച്ച 200 സെന്റിമീറ്ററായി എത്തും.
ജലനിരപ്പ് ഉയരുന്നതിന് അനുസരിച്ച് ഡാമിന് സമീപമുള്ള പ്രദേശങ്ങളില്‍ താമസിക്കുന്നവര്‍ ജാഗ്രത പാലിക്കേണ്ടതാണ് എന്ന് ജില്ലാ കളക്ടര്‍ അറിയിച്ചു. അപകടസാധ്യത ഒഴിവാക്കുന്നതിനായി നദിയിലേക്കുള്ള പ്രവേശനം ഒഴിവാക്കണമെന്നും, അനാവശ്യമായി തീരപ്രദേശങ്ങളിലേയ്ക്ക് പ്രവേശിക്കരുതെന്നും ജില്ലാ ഭരണകൂടം മുന്നറിയിപ്പ് നല്‍കിയിട്ടുണ്ട്.
ജില്ലാ ഇന്‍ഫര്‍മേഷന്‍ ഓഫീസറാണ് ഈ വിവരം ഔദ്യോഗികമായി പുറത്തുവിട്ടത്.
മഴ തുടരുന്ന സാഹചര്യത്തില്‍ നദിതീരത്ത് താമസിക്കുന്നവര്‍ അതീവ ജാഗ്രത പുലര്‍ത്തണമെന്നും, ദുരന്തനിവാരണ സംവിധാനങ്ങള്‍ സജ്ജമാണെന്നും ജില്ലാ ഭരണകൂടം അറിയിച്ചു.
