'ഏത്തമിട്ട് ക്ഷമ പറഞ്ഞ് അമ്മയിലേക്ക് വന്നാൽ മതി': നടിമാരോട് കെപിഎസി ലളിത

സംഘടനയിൽ നിന്ന് പുറത്ത് പോയവരെ തിരിച്ചെടുക്കണമെങ്കിൽ ഏത്തമിട്ട് ക്ഷമ പറഞ്ഞതിന് ശേഷം മതിയെന്ന് കെ പി എ സി ലളിത. മലയാള സിനിമയിൽ ഇപ്പോഴുള്ള പ്രശ്‌നങ്ങൾ അനാവശ്യമാണെന്ന് കെ പി എ സി ലളിത പറഞ്ഞു. നടിമാരെന്ന് വിളിക്കുന്നതിൽ എന്ത് തെറ്റാണുള്ളതെന്നും കൊച്ചിയില്‍ വാർത്താ സമ്മേളനത്തിൽ കെ പി എ സി ലളിത പറഞ്ഞു. 

'250 അംഗങ്ങൾ ഉള്ള അമ്മയിൽ ഒരൾ മാത്രമായിരിക്കില്ല വില്ലനെന്നും പരിഹാസ്യ രൂപേന കെ പി എ സി ലളിത പറഞ്ഞു. അമ്മയിലെ വില്ലനെ 'നമുക്ക് കണ്ടറിയാം' എന്ന് പാർവതി പറഞ്ഞതിനെക്കുറിച്ച് മാധ്യമപ്രവർത്തകൻ ചോദിച്ച ചോദ്യത്തിനായിരുന്നു കെ പി എ സി ലളിതയുടെ ഉത്തരം. 

'സംഘടനയിൽ പറയേണ്ടത് അവിടെ പറയണം, മറ്റ് സ്ഥലങ്ങളിൽ പോയി സംഘടനയെ അപഹാസ്യരാക്കരുതെന്നും കെപിഎസി ലളിത പറഞ്ഞു. ഈ പ്രശ്‌നങ്ങൾ ഒന്നുംതന്നെ അമ്മയുടെ കെട്ടുറപ്പിനെ ബാധിക്കില്ല. സംഘടനയ്ക്കുള്ളിൽ നിന്ന് പ്രസിഡന്റിനെ ചീത്ത വിളിക്കുന്നത് ശരിയല്ല. പരസ്യമായ അധിക്ഷേപം ഗുരുതരമായ സംഘടനാ വിരുദ്ധ പ്രവർത്തനമാണ്' - കെപിഎസി ലളിത പറഞ്ഞു.

എന്തെങ്കിലും ഒരു പ്രശ്‌നം കിട്ടിയാൽ കൈകൊട്ടി ചിരിക്കാൻ നോക്കിയിരിക്കുന്നവരാണ് എല്ലാവരും. ഈ പ്രശ്‌നങ്ങൾ എല്ലാവരും കൂടിയിരുന്ന് സംസാരിച്ചാൽ തീരാവുന്നതേ ഉണ്ടായിരുന്നുള്ളൂ. മറ്റ് ഭാഷകളിലെ സിനിമാ വ്യവസായ സംഘടനകളെ സംബന്ധിച്ച് വളരെ നല്ല രീതിയില്‍ നടന്നു പോവുന്ന ഒന്നാണ് അമ്മയെന്നും ലളിത പറഞ്ഞു. സംഘടനയിൽ നടക്കുന്ന കാര്യമൊന്നും പുറത്തു പറയാൻ പാടില്ല. നമ്മടെ അമ്മയോട് വന്ന് ക്ഷമ പറഞ്ഞാൽ എല്ലാവർക്കും തിരിച്ച് അകത്ത് കയറാവുന്നതേയുള്ളൂവെന്നും കെപിഎസി ലളിത പറഞ്ഞു.