കണ്ണൂര്‍ ജില്ലയില്‍ കാലവര്‍ഷം ശക്തമായിരിക്കെ കരുവാരക്കുണ്ടില്‍ ദുരന്ത നിവാരണ മുന്നൊരുക്കങ്ങളുടെ ഭാഗമായി 110 കുടുംബങ്ങളെ മാറ്റിപ്പാര്‍പ്പിച്ചു. കേരള എസ്റ്റേറ്റ് വില്ലേജിലെ 29 കുടുംബങ്ങളെ കരുവാരക്കുണ്ട് ഗവ. ഹയര്‍സെക്കന്‍ഡറി സ്‌കൂളിലെ ക്യാമ്പിലേക്കും 69 കുടുംബങ്ങളെ ബന്ധുവീടുകളിലേക്കും വാടക വീടുകളിലേക്കുമാണ് മാറ്റിയത്.
കരുവാരക്കുണ്ട് വില്ലേജിലെ വിവിധ ഭാഗങ്ങളില്‍ നിന്നായി 12 കുടുംബങ്ങളേയും ബന്ധുവീടുകളിലേക്കും വാടക വീടുകളിലേക്കുമായി മാറ്റി. മേഖലയില്‍ ശക്തമായ മഴയെ തുടര്‍ന്ന് ഒലിപ്പുഴയില്‍ ജലവിതാനം ഉയര്‍ന്നിട്ടുണ്ട്.
ഉയര്‍ന്ന പ്രദേശങ്ങളില്‍ മണ്ണിടിച്ചില്‍ ഭീഷണി നിലനില്‍ക്കുന്ന സാഹചര്യത്തില്‍ പഞ്ചായത്ത്, റവന്യൂ, പൊലീസ് വകുപ്പുകളുടെ നേതൃത്വത്തില്‍ ജാഗ്രത ശക്തമാക്കിയിട്ടുണ്ട്. ഉരുള്‍പ്പൊട്ടല്‍ ഭീഷണിയുള്ള പ്രദേശങ്ങളില്‍ മുന്‍കരുതല്‍ നിര്‍ദേശങ്ങള്‍ നേരത്തെ നല്‍കിയിരുന്നു.
