ടി.സി ഇല്ലെങ്കിലും സ്കൂൾ മാറാം, ഉത്തരവുമായി സർക്കാർ, അൺ എയ്ഡഡ് സ്കൂളുകൾക്ക് തിരിച്ചടി

പൊതുവിദ്യാലയങ്ങളില്‍ ഓരോ വര്‍ഷവും വിദ്യാര്‍ഥികളുടെ എണ്ണം കുത്തനെ കുറയുന്ന സാഹചര്യത്തില്‍ അണ്‍ എയ്ഡഡ് വിദ്യാലയങ്ങളില്‍ നിന്ന് വിദ്യാര്‍ഥികളെയെത്തിക്കാന്‍ നടപടികളുമായി സര്‍ക്കാര്‍. ഇതിന്റെ ഭാഗമായി 2 മുതല്‍ 10 വരെയുള്ള കുട്ടികളെ ട്രാന്‍സ്ഫര്‍ സര്‍ട്ടിഫിക്കറ്റ് ഇല്ലാതെ തന്നെ ചേര്‍ക്കാനാവുമെന്ന് പൊതുവിദ്യാഭ്യാസ വകുപ്പ് ഉത്തരവാക്കി. കുട്ടികള്‍ കൊഴിഞ്ഞുപോകുന്നത് തടയാനായി അണ്‍ എയ്ഡഡ് സ്‌കൂളുകള്‍ ടി സി നല്‍കാത്ത സാഹചര്യമുണ്ടെന്ന സാഹചര്യത്തിലാണ് നടപടി.

2 മുതല്‍ 8 വരെയുള്ള ക്ലാസുകളില്‍ വിദ്യഭ്യാസ അവകാശ നിയമപ്രകാരം വയസ് അടിസ്ഥാനമാക്കി പ്രവേശനം നല്‍കാമെന്നാണ് ഉത്തരവ്. ഒന്‍പത്,പത്ത് ക്ലാസുകളില്‍ വയസിന്റെയും പ്രവേശനപരീക്ഷയുടെയും അടിസ്ഥാനത്തില്‍ കുട്ടികളെ ചേര്‍ക്കാം. എല്ലാ വിഷയങ്ങള്‍ക്കും വകുപ്പ് തയ്യാറാക്കുന്ന ചോദ്യക്കടലാസ് ഉപയോഗിച്ച് വിദ്യാഭ്യാസ ഓഫീസറുടെ മേല്‍നോട്ടത്തിലായിരിക്കണം പരീക്ഷയെന്നാണ് ഉത്തരവ്.കഴിഞ്ഞ അധ്യയന വര്‍ഷം 3,55,96 വിദ്യാര്‍ഥികളാണ് അണ്‍ എയ്ഡഡ് മേഖലയില്‍ ഒന്ന് മുതല്‍ 10 വരെയുള്ള   ക്ലാസുകളില്‍ ഉണ്ടായിരുന്നത്. അതില്‍ നല്ലൊരു വിഭാഗത്തെ പൊതുവിദ്യാലയങ്ങളില്‍ എത്തിക്കാനാണ് സര്‍ക്കാര്‍ ലക്ഷ്യമിടുന്നത്.