Kerala Weather: ഇന്നുമുതല്‍ വീണ്ടും ശക്തമായ മഴ; എട്ട് ജില്ലകളില്‍ യെല്ലോ അലര്‍ട്ട്
ജൂലൈ 17 വരെ പൊതുവെ എല്ലാ ജില്ലകളിലും മഴ സാധ്യതയുണ്ടെങ്കിലും പൊതുവെ ഈ കാലയളവില്‍ ലഭിക്കുന്ന മഴയേക്കാള്‍ അളവ് കുറവായിരിക്കും
Kerala Weather: സംസ്ഥാനത്ത് ഇന്നുമുതല്‍ മഴ ശക്തമാകും. ഇന്നലെ നല്‍കിയിരുന്ന മഴ മുന്നറിയിപ്പ് പ്രകാരം ഇന്ന് സംസ്ഥാനത്ത് യെല്ലോ അലര്‍ട്ട് ഉണ്ടായിരുന്നില്ല. എന്നാല്‍ ഇപ്പോള്‍ പുറത്തുവന്ന പുതുക്കിയ മഴ മുന്നറിയിപ്പ് പ്രകാരം എട്ട് ജില്ലകളില്‍ യെല്ലോ അലര്‍ട്ട്.
എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍ഗോഡ് ജില്ലകളിലാണ് യെല്ലോ അലര്‍ട്ട് പുറപ്പെടുവിച്ചിരിക്കുന്നത്. ഈ ജില്ലകളില്‍ നാളെയും (ജൂലൈ 12) യെല്ലോ അലര്‍ട്ടാണ്. ഒറ്റപ്പെട്ട ശക്തമായ മഴയാണ് യെല്ലോ അലര്‍ട്ട് കൊണ്ട് അര്‍ത്ഥമാക്കുന്നത്.
ജൂലൈ 17 വരെ പൊതുവെ എല്ലാ ജില്ലകളിലും മഴ സാധ്യതയുണ്ടെങ്കിലും പൊതുവെ ഈ കാലയളവില്‍ ലഭിക്കുന്ന മഴയേക്കാള്‍ അളവ് കുറവായിരിക്കും. കാസര്‍ഗോഡ്, കണ്ണൂര്‍ ജില്ലകളിലും തൃശൂര്‍ മുതല്‍ ആലപ്പുഴ വരെ തീരദേശ മേഖലയിലും ആയിരിക്കും കൂടുതല്‍ മഴ. ജൂലൈ 18 മുതല്‍ 24 വരെയുള്ള ദിവസങ്ങളില്‍ കാലവര്‍ഷം കനക്കും.
