വീട്ടില്‍ 60 ഓളം തെരുവ് നായ്ക്കളെ വളര്‍ത്തുന്നു; നിരന്തരം കുരയ്ക്കുകയും ദുര്‍ഗന്ധം വമിക്കുകയും ചെയ്യുന്നതായി അയല്‍ക്കാരുടെ പരാതി

കൊച്ചി കുന്നത്തുനാട് ആണ് സംഭവം. ഒരു സ്ത്രീ വീട് വാടകയ്ക്കെടുത്ത് ഏകദേശം 60 തെരുവ് നായ്ക്കളെയാണ്  പരിപാലിക്കുന്നത്, ഇതിനെതിരെ പ്രതിഷേധവുമായി പ്രദേശവാസികള്‍ രംഗത്തെത്തിയിരിക്കുകയാണിപ്പോള്‍. വീണ ജനാര്‍ദ്ദനന്‍ എന്ന സ്ത്രീയാണ് വാടക വീട്ടില്‍ നായ്ക്കളെ വളര്‍ത്തുന്നത്. നായ്ക്കള്‍ നിരന്തരം കുരയ്ക്കുന്നുണ്ടെന്നും പ്രദേശത്ത് ദുര്‍ഗന്ധം വമിക്കുന്നുണ്ടെന്നും നാട്ടുകാര്‍ പരാതി പറയുന്നു. ഇവിടെ നിന്ന് ഇപ്പോള്‍ നായ്ക്കളെ നീക്കം ചെയ്യാന്‍ കഴിയില്ലെന്ന് വീണ പറയുന്നു. 'സ്ഥലം വൃത്തിയാക്കാന്‍ ജീവനക്കാര്‍ വരും. നായ്ക്കള്‍ ആളുകളെ കാണുമ്പോള്‍ കുരയ്ക്കും. വീടിന്റെ ഉടമയും ഒരു മൃഗസ്‌നേഹിയാണ്. 

താന്‍ ഒരു നായയെയോ പന്നിയോ മറ്റെന്തെങ്കിലുമോ വളര്‍ത്തുമെന്ന് ഇവര്‍ പറഞ്ഞു. മൃഗങ്ങളെ വളര്‍ത്തുന്നതിന് ഒരു കരാറുണ്ടെന്നും അതില്‍  എത്ര നായ്ക്കളെ വളര്‍ത്താമെന്ന് കരാറില്‍ പറഞ്ഞിട്ടില്ലെന്നും താന്‍ മൃഗങ്ങളെ രക്ഷിക്കുന്ന ഒരാള്‍ ആണെന്നും വീണ  പറഞ്ഞു. ആ വീട്ടില്‍ നിന്ന് നായ്ക്കളെ നീക്കം ചെയ്യുമെന്ന് എംഎല്‍എ പി.വി. ശ്രീനിജിന്‍ നാട്ടുകാരോട് പറഞ്ഞു. 'ഞാന്‍ അവിടെ പോയി. ആ വീട്ടില്‍ അറുപത് നായ്ക്കളും രണ്ട് സ്ത്രീകളും ഒരു ചെറിയ കുട്ടിയും താമസിക്കുന്നുണ്ട്. ഞാന്‍ വീട്ടില്‍ കയറാന്‍ ശ്രമിച്ചില്ല. ഞാന്‍ ഹെല്‍ത്ത് ഇന്‍സ്‌പെക്ടറെയും പോലീസിനെയും വിളിച്ചു. 

അവിടെ വാടകയ്ക്ക് താമസിച്ചിരുന്ന സ്ത്രീയോട് ഞാന്‍ സംസാരിച്ചു. എനിക്ക് ഒരു പരാതി ലഭിച്ചിട്ടുണ്ടെന്ന് ഞാന്‍ അവരോട് പറഞ്ഞു. എന്നിരുന്നാലും, അവര്‍ പോലീസിനെ അകത്തേക്ക് കടത്തിയില്ല. 1998 ലെ കേരള മുനിസിപ്പാലിറ്റി നിയമങ്ങളില്‍ വ്യക്തമായി പറഞ്ഞിട്ടുള്ള ഒരു കാര്യമുണ്ട്. ഏതെങ്കിലും വീട്ടില്‍ നായ്ക്കളെ വളര്‍ത്തുകയാണെങ്കില്‍, പഞ്ചായത്ത് നിയമങ്ങള്‍ അനുസരിച്ച് സെക്രട്ടറി അവയ്ക്ക് ലൈസന്‍സ് നല്‍കണം. അവര്‍ അത്തരമൊരു ലൈസന്‍സ് എടുത്തിട്ടില്ലെന്ന് ഞാന്‍ മനസ്സിലാക്കുന്നു,' എംഎല്‍എ നാട്ടുകാരെ അറിയിച്ചു.