കൊച്ചിയിൽ യുവനടി ആക്രമിക്കപ്പെട്ട കേസിലെ പ്രധാനസാക്ഷി ദിലീപിന്റെ മുൻഭാര്യയും നടിയുമായ മഞ്ജു വാര്യർ ആണ്. കാവ്യ - ദിലീപ് ബന്ധം മഞ്ജുവിനെ അറിയിച്ചതാണ് നടിയോട് ദിലീപിനു വൈരാഗ്യം ഉണ്ടാകാൻ കാരണമെന്ന് കുറ്റപത്രത്തിൽ പറയുന്നുണ്ട്. എന്നാൽ, ആക്രമിക്കപ്പെട്ട നടിയല്ല കാവ്യ - ദിലീപ് ബന്ധം തന്നെ അറിയിച്ചതെന്ന് മഞ്ജു വാര്യരുടെ മൊഴി.
ദിലീപ് സംശയരോഗിയാണെന്നും മഞ്ജുവിന്റെ മൊഴിയിൽ പറയുന്നു. നിരവധി തവണ കാവ്യയേയും ദിലീപിനേയും പലരും പല സ്ഥലത്തും ഒന്നിച്ച് കണ്ടിട്ടുണ്ട്. മിക്കപ്പോഴും ആക്രമിക്കപ്പെട്ട നടിയും ഇവർക്കൊപ്പം ഉണ്ടാകും. എന്തും വെട്ടിത്തുറന്ന് പറയുകയും ധാരാളം സംസാരിക്കുകയും ചെയ്യുന്ന സ്വഭാവക്കാരിയാണ് നടി.
ദിലീപിനേയും കാവ്യയേയും ചേർത്ത് പ്രചരി‌ക്കപ്പെട്ട കഥകൾക്ക് പിന്നിൽ ഈ നടിയാണെന്ന് ദിലീപ് വിശ്വസിച്ചു. തെറ്റിദ്ധാരണ മൂലം ഈ നടിയോട് ദിലീപിനു നീരസം ഉണ്ടായിരുന്നുവെന്ന് മഞ്ജുവിന്റെ മൊഴിയിൽ ചൂണ്ടിക്കാട്ടുന്നുണ്ട്. എന്നാൽ, കുറ്റകൃത്ത്യത്തിൽ ദിലീപിനു പങ്കുണ്ടോയെന്ന് അറിയില്ലെന്നും മഞ്ജു പറയുന്നു.
എന്തിനേയും സംശയത്തോടെ മാത്രമായിരുന്നു ദിലീപ് നോക്കിയിരുന്നത്. തെറ്റിദ്ധാരണമാറ്റാൻ പലപ്പോഴും ശ്രമിച്ചു. പക്ഷേ കഴിഞ്ഞില്ല. അങ്ങേയറ്റം ക്ഷമിച്ച് നോക്കി. ഒന്നിച്ച് പോകാൻ ബുദ്ധിമു‌ട്ടാണെന്ന് തോന്നിയത് കൊണ്ടാണ് പിരിഞ്ഞതെന്ന് മഞ്ജു പറയുന്നു. കേസിൽ മഞ്ജുവിന്റെ ഈ മൊഴികൾ നിർണായകമാകും.