ലോക്ക് ഡൗണ്‍ ലംഘിച്ച് മീന്‍ പിടിച്ച ഇതര സംസ്ഥാന തൊഴിലാളികളടക്കമുള്ള 20 പേരെ പൊലീസ് അറസ്റ്റുചെയ്തു. ആലത്തൂര്‍ പടിയിലെ തോട്ടിലാണ് ഇവര്‍ കൂട്ടം കൂടി മീന്‍പിടിക്കുന്നത് പൊലീസിന്റെ ഡ്രോണ്‍ ക്യാമറയില്‍ കിട്ടിയത്. ഇതറിഞ്ഞ് ഓടി രക്ഷപ്പെടാന്‍ ശ്രമിക്കുന്നതിനിടെയാണ് പൊലീസിന്റെ പിടി വീഴുന്നത്.
പിടിയിലായവരില്‍ ഏഴുപേര്‍ ഇതരസംസ്ഥാന തൊഴിലാളികളാണ്. സ്റ്റേഷനില്‍ എത്തിച്ച് കേസെടുത്ത ശേഷം ഇവരെ വിട്ടയച്ചു. ജോലിയില്ലാതെ വെറുതെയിരുന്നപ്പോള്‍ സമയം കളയാന്‍ വേണ്ടിയാണ് തോട്ടില്‍ മീന്‍ പിടിക്കാനിറങ്ങിയതെന്നാണ് അതിഥി തൊഴിലാളികള്‍ പൊലീസിനോട് പറഞ്ഞത്. പിടിച്ച മീനും വലയും പോലീസ് കസ്റ്റഡിയില്‍ എടുത്തിട്ടുണ്ട്.
