മോൻസൻ മാവുങ്കൽ നടൻ വിക്രമിന്റെ പേരിലും തട്ടിപ്പ് നടത്തിയതായി പരാതി. മട്ടാഞ്ചേരിയിലെ പുരാവസ്‌തു സ്ഥാപനം വാങ്ങാനായി വിക്രമിന്റെ ബിനാമി എന്ന പേരിലാണ് മോൻസൻ എത്തിയത്. അൻപത് കോടിക്ക് സ്ഥാപനം വാങ്ങാമെന്ന് മോൻസൻ പറഞ്ഞതായി സ്ഥാപന ഉടമ അബ്‌ദുൾ സലാം പറഞ്ഞു. എച്ച്എസ്‌ബി‌സി ബാങ്കിൽ പണമുണ്ടെന്ന് രേഖ കാണിച്ച് തന്നെ കബളിപ്പിച്ചതായും സലാം പറയുന്നു.
അതേസമയം തട്ടിപ്പ് കേസിൽ പ്രതിയായ മോൻസൻ മാവുങ്കലിനെ ഡോക്‌ടർ എന്ന നിലയിലാണ് പരിചയമെന്ന് നടൻ ശ്രീനിവാസൻ പറഞ്ഞു. തനിക്ക് ഹരിപ്പാടുള്ള ആയുർവേദ ആശുപത്രിയിൽ ചികിത്സ ശരിയാക്കിയത് മോൻസൻ ആണെന്നും ചികിത്സാപണം മോൻസനാണ് നൽകിയതെന്നും ശ്രീനിവാസൻ പറഞ്ഞു. മോൻസൻ തട്ടിപ്പ്കാരനാണെന്നറിഞ്ഞിരുന്നില്ലെന്നും ശ്രീനിവാസൻ പറഞ്ഞു.
