ആകെയുള്ളത് ഒരു ബാങ്ക് അക്കൗണ്ട്, അതില്‍ 176 രൂപ ബാലന്‍സ് ഉണ്ട്; തട്ടിപ്പ് കേസില്‍ അകത്തായ മോന്‍സണ്‍

തനിക്ക് ആകെയുള്ള ഒരു ബാങ്ക് അക്കൗണ്ട് മാത്രമാണെന്ന് മോന്‍സണ്‍ മാവുങ്കല്‍. തന്റെ ബാങ്ക് അക്കൗണ്ടില്‍ 176 രൂപ മാത്രമേ ബാലന്‍സ് ഉള്ളൂ എന്നും മോന്‍സണ്‍ പറഞ്ഞു. മകളുടെ കല്യാണത്തിന് സുഹൃത്തായ ജോര്‍ജില്‍ നിന്ന് കടം വാങ്ങിയെന്നും കൂടെയുള്ളവര്‍ക്ക് ആറ് മാസമായി ശമ്പളം പോലും നല്‍കിയിട്ടില്ലെന്നും മോന്‍സണ്‍ മാവുങ്കല്‍ ക്രൈം ബ്രാഞ്ചിന് മൊഴി നല്‍കി. തട്ടിപ്പിലൂടെ കിട്ടിയിരുന്ന പണമെല്ലാം ആര്‍ഭാട ജീവിതത്തിനു ചെലവഴിക്കുകയായിരുന്നു എന്നാണ് റിപ്പോര്‍ട്ട്. ബാങ്ക് മുഖേനയുള്ള ഇടപാടുകള്‍ കുറവായിരുന്നു. കാറിനുള്ളില്‍ പണം എണ്ണുന്ന മെഷീന്‍ വച്ചായിരുന്നു കാര്യങ്ങള്‍ നടത്തിയിരുന്നതെന്നും ക്രൈം ബ്രാഞ്ച് സംശയിക്കുന്നു. ബാങ്ക് മുഖേന ഇടപാടുകള്‍ നടത്തിയാല്‍ പിടിക്കപ്പെടുമെന്ന് ഇയാള്‍ ഭയപ്പെട്ടിരുന്നു. ക്രൈം ബ്രാഞ്ച് കൂടുതല്‍ അന്വേഷണം നടത്തുകയാണ്.