'ഞങ്ങൾ ഈ നാട്ടുകാരാ, നീ കൂടുതൽ കളിക്കാൻ നിക്കാതെ ഇവളേയും വിളിച്ചോണ്ട് പോ' - കൊച്ചിയിൽ വീണ്ടും സദാചാര ഗുണ്ടാ വിളയാട്ടം

'നീ ഇവളേയും വിളിച്ചോണ്ട് പോ' - യുവാവിനു നേരെ സദാചാര ഗുണ്ടാ വിളയാട്ടം

കേരളത്തിൽ അടുത്തിടെ സദാചാരവാദികളുടെ ഗുണ്ടാ വിളയാട്ടം നിരവധിയാണ് റിപ്പോർട്ട് ചെയ്തിരിക്കുന്നത്. അടുത്തിടെ കാക്കനാട് ഇന്‍ഫോപാര്‍ക്കിന് സമീപമുള്ള മുന്‍സിപ്പല്‍ പാര്‍ക്കില്‍ വന്നിരുന്ന യുവതിയ്ക്കും യുവാവിനും നേരെയും സമാനമായ സംഭവമാണ് ഉണ്ടായത്.

പാര്‍ക്കില്‍ വന്നിരുന്ന യുവാവിനെയും, യുവതിയെയും സദാചാര ഗുണ്ടകള്‍ ചേര്‍ന്ന് കൈയ്യേറ്റം ചെയ്യാന്‍ ശ്രമിക്കുന്നതും, അസഭ്യവര്‍ഷം നടത്തുകയും ചെയ്യുന്ന വീഡിയോ പുറത്ത് വന്നിരിക്കുകയാണ്. വീഡിയോ പുറത്തുവന്നതോടെയാണ് സംഭവം പുറംലോകമറിയുന്നത് തന്നെ.

യുവാവിനോട് തട്ടികയറിയ ശേഷം യുവതിയെ കേട്ടാലറയ്ക്കുന്ന അസഭ്യവും സദാചാര ഗുണ്ടകളില്‍ ഒരാള്‍ വിളിച്ച് കൂവുന്നുണ്ട്. താന്‍ ഈ നാട്ടുകാരനാണെന്നും, ഇവിടെ വന്ന് വെറുതെ മുട്ടാന്‍ നില്‍ക്കണ്ടയെന്നും ഇയാള്‍ പറയുന്നത് വീഡിയോയില്‍ നിന്നും വ്യക്തം. 

കാക്കനാട് മുന്‍സിപ്പല്‍ പാര്‍ക്കില്‍ മുന്‍പും ഇത്തരം സംഭവങ്ങള്‍ റിപ്പോര്‍ട്ട് ചെയ്തിട്ടുണ്ട്. പോലീസ് ഈ സദാചാര ഗുണ്ടകള്‍ക്കെതിരെ കര്‍ശന നടപടി സ്വീകരിക്കണമെന്നാണ് വൈറലായ വീഡിയോയ്ക്ക് കീഴെ പ്രത്യക്ഷമാകുന്ന പൊതുവികാരം.