കനത്ത മഴ; മുല്ലപ്പെരിയാർ ജലനിരപ്പ് 136 അടി, ആദ്യഘട്ട ജാഗ്രത നിർദ്ദേശം നൽകി

സംസ്ഥാനത്ത് മഴ ശക്തമായി തുടരുന്ന സാഹചര്യത്തിൽ മുല്ലപ്പെരിയാർ അണക്കെട്ടിലെ ജലനിരപ്പ് 136 അടിയായി ഉയർന്നു. ഇതോടെ ആദ്യഘട്ട ജാഗ്രതാ നിർദ്ദേശം നൽകി. അണക്കെട്ടിന്റെ സംഭരണ ശേഷി 142 അടിയാണ്. വൃഷ്‌ടിപ്രദേശത്ത് കനത്ത മഴ തുടരുന്നതുകൊണ്ടാണ് അണക്കെട്ടിലെ ജലനിരപ്പ് ഉയരുന്നത്. 

അണക്കെട്ടിലേക്കുള്ള നീരൊഴുക്കിൽ വൻവർദ്ധനവ് ഉണ്ട്. 142 അടിയിലേക്കെത്തിയാൽ കൂടുതൽ വെള്ളം തമിഴ്‌നാട്ടിലേക്ക് ഒഴുക്കുകയാണ് ചെയ്യുക. എന്നാൽ തമിഴ്‌നാട്ടിലേക്ക് കൊണ്ടുപോകാൻ പറ്റാത്തവിധം മഴ ശക്തമായാൽ അണക്കെട്ടിന്റെ സ്‌പിൽവേ ഷട്ടറുകൾ ഉയർത്തി ഇടുക്കി ഡാമിലേക്ക് വെള്ളം ഒഴുക്കിവിടുമെന്നാണ് സൂചന.

എന്നാൽ, ഇടുക്കി ഡാമിലേക്ക് വെള്ളം ഒഴുക്കിവിടുന്നത് പെരിയാറിന്റെ കരകളിൽ താമസിക്കുന്നവർക്ക് ഭീഷണിയാകും. ഇടുക്കി അണക്കെട്ടിന്റെ ഷട്ടറുകൾ ഉയർത്തിയപ്പോഴും ആ പ്രദേശങ്ങളിൽ വെള്ളപ്പൊക്ക ഭീഷണി നേരിട്ടിരുന്നു. മുല്ലപ്പെരിയാര്‍ സംഭരണിയിലെ ജലനിരപ്പ് ഇപ്പോഴത്തെ 152 അടിയാക്കി ഉയര്‍ത്തണമെന്ന ആവശ്യത്തിലാണ് ഇപ്പോള്‍ തമിഴ്നാട്. 2014-ലെ സുപ്രീംകോടതി വിധിയോടെ 142 ആക്കി ഉയര്‍ത്തി. അത് 152 ആക്കുന്നതിനുള്ള വാദങ്ങൾ തുടർന്നുകൊണ്ടിരിക്കുകയാണ്.