പാലക്കാട്: കൊഴിഞ്ഞാമ്പാറയിൽ കഴിഞ്ഞ ദിവസം ഗൃഹനാഥൻ മരിച്ചതുമായി ബന്ധപ്പെട്ടു ഇയാളുടെ മകനെ പോലീസ് അറസ്റ്റ് ചെയ്തു. പഴനിയർപാളയം കുള്ളരായൻപാളയം പരേതനായ പിച്ചമുത്തു മകൻ ഗജേന്ദ്രൻ എന്ന 52 കാരനാണ് ഇയാളുടെ ഇളയമകൻ തമിഴ്‌സിൽവന്റെ (26) മരക്കഷണം കൊണ്ടുള്ള അടിയേറ്റു മരിച്ചത്. തമിഴ്‌സിൽവനെ പോലീസ് അറസ്റ്റ് ചെയ്തു.
രണ്ടു ദിവസം മുമ്പ് വൈകിട്ട് പഴനിയർപാളയത്തെ വാടക വീട്ടിൽ മദ്യപാനത്തെ ചൊല്ലി ഇരുവരും തമ്മിൽ വാക്കുതർക്കമുണ്ടായി. തർക്കത്തിനൊടുവിലാണ് മകൻ പിതാവിനെ ക്രൂരമായി മർദ്ദിച്ചത്. തുടർന്ന് തമിഴ്‌സിൽവൻ ഗജേന്ദ്രന്റെ മൂത്ത മകനായ സഹോദരൻ വെട്രിസെൽവനെ ഫോണിൽ വിളിച്ചു പിതാവ് കുഴഞ്ഞു വീണുകിടക്കുന്നു എന്നറിയിച്ചു.
വിവരം അറിഞ്ഞു വെട്രിസെൽവൻ ഗജേന്ദ്രനെ ആശുപത്രിയിലേക്ക് കൊണ്ടുപോയെങ്കിലും രക്ഷിക്കാനായില്ല. തുടർന്ന് നടത്തിയ അന്വേഷണത്തിലാണ് മകന്റെ മർദ്ദനമേറ്റാണ് ഗജേന്ദ്രൻ മരിച്ചതെന്ന് കണ്ടെത്തിയതും അറസ്റ്റ് ചെയ്തതും. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കൊഴിഞ്ഞാമ്പാറ സി.ഐ ശശിധരന്റെ നേതൃത്വത്തിലുള്ള പോലീസ് സംഘമാണ് പ്രതിയെ അറസ്റ്റ് ചെയ്തത്.