P.V.Anvar: 'വായില്‍ തോന്നുന്നത് വിളിച്ചുപറയുന്ന സ്വഭാവം'; അന്‍വറിനെ അടുപ്പിക്കരുതെന്ന് ലീഗ്
അതേസമയം പൂര്‍ണമായി പ്രതിരോധത്തിലായ അന്‍വര്‍ യുഡിഎഫിനു വഴങ്ങാനാണ് സാധ്യത
P.V.Anvar: പി.വി.അന്‍വറിനെതിരെ കോണ്‍ഗ്രസ് നേതൃത്വം ശക്തമായ നിലപാടെടുക്കാന്‍ കാരണം മുസ്ലിം ലീഗ്. ഒരുകാരണവശാലും അന്‍വറിനോടു വഴങ്ങരുതെന്ന് ലീഗ് നേതൃത്വം കോണ്‍ഗ്രസിനോടു ആവശ്യപ്പെട്ടു. യുഡിഎഫ് മുന്നോട്ടുവയ്ക്കുന്ന ഉപാധികള്‍ അംഗീകരിക്കാന്‍ തയ്യാറാണെങ്കില്‍ മാത്രം അന്‍വറിനെ അസോഷ്യേറ്റ് അംഗമെന്ന നിലയില്‍ ഒപ്പം കൂട്ടിയാല്‍ മതിയെന്നാണ് ലീഗ് നിലപാട്.
നിലമ്പൂര്‍ ഉപതിരഞ്ഞെടുപ്പില്‍ അന്‍വറിന്റെ പിന്തുണയില്ലെങ്കിലും യുഡിഎഫിനു ജയിക്കാന്‍ സാധിക്കുന്ന സാഹചര്യമുണ്ട്. അന്‍വറിനു വഴങ്ങേണ്ട രാഷ്ട്രീയ സ്ഥിതി നിലവില്‍ നിലമ്പൂരില്‍ ഇല്ല. ഒറ്റയ്ക്കു മത്സരിച്ചാല്‍ രണ്ടായിരത്തില്‍ കൂടുതല്‍ വോട്ടുകള്‍ പോലും അന്‍വറിനു ലഭിക്കില്ലെന്നും ലീഗ് വിലയിരുത്തുന്നു. അന്‍വറിനു വേണ്ടി ഒരു വിട്ടുവീഴ്ചയ്ക്കും ലീഗ് തയ്യാറല്ലെന്നാണ് സൂചന.
എല്‍ഡിഎഫില്‍ ആയിരിക്കെ അന്‍വര്‍ ലീഗിനെതിരെ രൂക്ഷ വിമര്‍ശനങ്ങള്‍ നടത്തിയിട്ടുണ്ട്. ഇക്കാരണത്താലാണ് അന്‍വറുമായി സഹകരിക്കാന്‍ ലീഗ് അതൃപ്തി അറിയിച്ചത്. യുഡിഎഫ് പറയുന്ന കാര്യങ്ങള്‍ അംഗീകരിച്ച് ഒപ്പം നില്‍ക്കാന്‍ സമ്മതിച്ചാല്‍ മാത്രം അന്‍വറിനെ പരിഗണിച്ചാല്‍ മതിയെന്നാണ് ലീഗ് നേതൃത്വം കോണ്‍ഗ്രസ് നേതൃത്വത്തെ നിലപാട് അറിയിച്ചിരിക്കുന്നത്. അന്‍വര്‍ - കോണ്‍ഗ്രസ് ചര്‍ച്ചകളില്‍ ഇടനിലക്കാരാകാന്‍ ഇല്ലെന്നും ലീഗ് വ്യക്തമാക്കി.
അതേസമയം പൂര്‍ണമായി പ്രതിരോധത്തിലായ അന്‍വര്‍ യുഡിഎഫിനു വഴങ്ങാനാണ് സാധ്യത. അന്‍വര്‍ നേതൃത്വം നല്‍കുന്ന കേരളത്തിലെ തൃണമൂല്‍ കോണ്‍ഗ്രസിനെ യുഡിഎഫ് അസോഷ്യേറ്റ് അംഗമെന്ന നിലയില്‍ അംഗീകരിച്ചേക്കും. അങ്ങനെ വന്നാല്‍ നിലമ്പൂരില്‍ കോണ്‍ഗ്രസ് സ്ഥാനാര്‍ഥിക്കായി അന്‍വര്‍ പ്രചാരണത്തിനിറങ്ങും.
