50 വര്‍ഷം മുന്‍പ് നാലാം ക്ലാസില്‍ തല്ലുകൂടിയതിന്റെ പക; കാസര്‍ഗോഡ് പട്ടാപ്പകല്‍ 60 കാരന്റെ പല്ല് അടിച്ചു തെറിപ്പിച്ചു

ഉച്ചയ്ക്ക് 1 മണിയോടെ മാലോം ടൗണിന് സമീപം 62 വയസ്സുള്ള ബാലകൃഷ്ണനും മാത്യു വല്യപ്ലാക്കലും വി.ജെ. ബാബു എന്നയാളെ ആക്രമിക്കുകയായിരുന്നു.

കാസര്‍ഗോഡ്: 50 വര്‍ഷമായി കൊണ്ടുനടന്ന വ്യക്തിപരമായ  വൈരാഗ്യം ഒടുവില്‍ ആക്രമണത്തില്‍ കലാശിച്ചു. കാസര്‍ഗോഡ് ജില്ലയിലെ മാലോം എന്ന ചെറിയ ഗ്രാമത്തില്‍ കുറച്ച് ദിവസങ്ങള്‍ക്ക് മുമ്പാണ് സംഭവം നടന്നത്. പോലീസ് പറയുന്നതനുസരിച്ച്, ഉച്ചയ്ക്ക് 1 മണിയോടെ മാലോം ടൗണിന് സമീപം 62 വയസ്സുള്ള ബാലകൃഷ്ണനും മാത്യു വല്യപ്ലാക്കലും വി.ജെ. ബാബു എന്നയാളെ ആക്രമിക്കുകയായിരുന്നു. 

ബാലകൃഷ്ണന്‍ ബാബുവിന്റെ കോളറില്‍ പിടിക്കുകയും മാത്യു കല്ലുകൊണ്ട് മുഖത്തും പുറകിലും മര്‍ദ്ദിക്കുകയുമായിരുന്നു. മര്‍ദ്ദനത്തില്‍

വെള്ളരിക്കുണ്ട് സ്വദേശിയായ 62 വയസ്സുള്ള ബാബുവിന്റെ പല്ല് നഷ്ടപ്പെട്ടു. പരിക്കേറ്റ ഇയാള്‍ കണ്ണൂരിലെ ആശുപത്രിയില്‍ ചികിത്സയിലാണ്. നാലാം ക്ലാസില്‍ പഠിക്കുമ്പോള്‍ ഒരിക്കല്‍ തല്ല് കൂടിയതിലുള്ള പകയാണ് മര്‍ദ്ദനത്തില്‍ കലാശിച്ചത്. 

സംഭവത്തില്‍ ഭാരതീയ ന്യായ സംഹിത (ബിഎന്‍എസ്) സെക്ഷന്‍ 126 (2), 118 (1), 3 (5) എന്നിവ പ്രകാരം പ്രതികള്‍ക്കെതിരെ പോലീസ് കേസെടുത്തിട്ടുണ്ട്. എന്നാല്‍ കോടതിക്ക് പുറത്ത് തര്‍ക്കം പരിഹരിക്കാന്‍ ബാബു സന്നദ്ധനാണെന്നും പ്രതികളില്‍ നിന്ന് 1.5 ലക്ഷം രൂപ നഷ്ടപരിഹാരം ആവശ്യപ്പെട്ടതായും പോലീസ് പറഞ്ഞു.