കാവ്യയുടെ അമ്മ പറഞ്ഞതില്‍ പൊരുത്തക്കേടുകള്‍ ഉണ്ട്, ഒന്നും വിശ്വസനീയമല്ല; ശ്യാമളയെ വീണ്ടും ചോദ്യം ചെയ്യും
കുരുക്കുകള്‍ മുറുകുന്നു...
കൊച്ചിയില്‍ യുവനടിയെ ആക്രമിച്ച സംഭവത്തിലെ ഗൂഢാലോചന സംബന്ധിച്ച വിവരങ്ങള്‍ അന്വേഷിക്കുന്ന പ്രത്യേക സംഘം ദിലീപിനെതിരെയുള്ള കുറുക്കുകള്‍ മുറുക്കുന്നു. കേസുമായി ബന്ധപ്പെട്ട് അറസ്റ്റിലായ ദിലീപിന്റെ ഭാര്യ കാവ്യാ മാധവന്റെ അമ്മ ശ്യാമളയെ പൊലീസ് വീണ്ടും ചോദ്യം ചെയ്യും.
കഴിഞ്ഞ ദിവസം ഇവരുടെ മൊഴി പൊലീസ് രേഖപ്പെടുത്തിയിരുന്നു. കാവ്യയെ ചോദ്യം ചെയ്തതിനു ശേഷമാണ് അന്വേഷണ സംഘം ശ്യാമളയുടെ മൊഴി രേഖപ്പെടുത്തിയത്. പ്രത്യേക ചോദ്യാവലി പൊലീസ് തയ്യാറാക്കിയിരുന്നു. ഏകദേശം ആറ്‌ മണിക്കൂറോളം നീണ്ടുനിന്നിരുന്നു ചോദ്യം ചെയ്യല്‍.
കാവ്യയെ വീണ്ടും ചോദ്യം ചെയ്യുമെന്ന് റിപ്പോര്‍ട്ടുകള്‍ ഉണ്ടായിരുന്നെകിലും തല്‍ക്കാ‍ലം താരത്തിനെതിരെ ഒരു നടപടിയും വേണ്ടെന്ന നിഗമനത്തിലാണ് പൊലീസ്. ആവശ്യമെങ്കില്‍ കാവ്യയെ ഇനിയും വിളിപ്പിക്കുമെന്ന് പൊലീസ് വ്യക്തമാക്കിയിട്ടുണ്ട്. ശ്യാമളയില്‍ നിന്നും കൂടുതല്‍ വിവരങ്ങള്‍ ലഭിക്കാനുണ്ടെന്ന് പൊലീസ് പറയുന്നു. കഴിഞ്ഞ ദിവസം ശ്യാമള നല്‍കിയ മൊഴി പൊലീസ് പരിശോധിച്ചു. ഇതില്‍ അവര്‍ പറഞ്ഞ കാര്യങ്ങളില്‍ പൊരുത്തക്കേടുകള്‍ ഉണ്ട്. ഇതിന്റെ പശ്ചാത്തലത്തിലാണ് ശ്യാമളയെ വീണ്ടും ചോദ്യം ചെയ്യുക.
