രജനീകാന്ത് പിന്‍‌മാറി, രാഷ്ട്രീയത്തിലേക്കില്ലെന്ന് അറിയിച്ചു; ആരോഗ്യപരമായ കാരണങ്ങളെന്ന് വിശദീകരണം

സൂപ്പര്‍സ്റ്റാര്‍ രജനീകാന്ത് രാഷ്ട്രീയത്തിലേക്കില്ല. ഇക്കാര്യം അദ്ദേഹം ഔദ്യോഗികമായി അറിയിച്ചു. ആരോഗ്യപരമായ കാരണങ്ങളാലാണ് പിന്മാറുന്നതെന്ന് ട്വിറ്ററിലൂടെ രജനി അറിയിച്ചു.

കോവിഡ് സാഹചര്യം ഒഴിവാക്കണമെന്ന ഡോക്‍ടറുടെ നിര്‍ദ്ദേശം അനുസരിക്കുകയാണ്. എന്നെ വിശ്വസിച്ച് രാഷ്ട്രീയത്തില്‍ ഇറങ്ങുന്നവര്‍ ദുഃഖിക്കാന്‍ ഇടയുണ്ടാകരുത് - രജനി വ്യക്തമാക്കി.

ഡിസംബര്‍ 31ന് പാര്‍ട്ടി പ്രഖ്യാപിക്കുമെന്നാണ് രജനികാന്ത് അറിയിച്ചിരുന്നത്. അതിനിടെ, അദ്ദേഹം രക്തസമ്മര്‍ദ്ദത്തിലെ വ്യതിയാനത്തെ തുടര്‍ന്ന് ആശുപത്രിയില്‍ പ്രവേശിച്ചിരുന്നു. നേരത്തേ അദ്ദേഹം വൃക്കമാറ്റ ശസ്ത്രക്രിയയ്ക്ക് വിധേയനായതുകൂടി കണക്കിലെടുത്ത് ഡോക്‍ടര്‍മാര്‍ രജനികാന്തിന് കോവിഡ് കാലം സൂക്ഷിക്കണമെന്ന മുന്നറിയിപ്പ് നല്‍കുകയായിരുന്നു.