ഒപ്പം താമസിക്കുന്ന പെണ്‍കുട്ടിയും അമ്മയും ചേര്‍ന്ന് ക്രൂരമായി മര്‍ദ്ദിച്ചെന്ന പരാതിയുമായി മിനിസ്ക്രീൻ താരം നളിനി നേഗി. മുംബൈ ഓഷിവാര പൊലീസ് സ്‌റ്റേഷനില്‍ നളിനി പരാതി നല്‍കി. കേസ് രജിസ്‌റ്റര്‍ ചെയ്‌ത് അന്വേഷണം ആരംഭിച്ചതായി പൊലീസ് പറഞ്ഞു.
പ്രീതി റാണ എന്ന പെൺകുട്ടിയും അമ്മയും ചേർന്ന് മര്‍ദ്ദിച്ചെന്നാണ് നളിനി പരാതിയില്‍ പറയുന്നത്. രണ്ടു വര്‍ഷം മുമ്പ് പ്രീതി തനിക്കൊപ്പം താമസിച്ചിരുന്നു. കൂടുതല്‍ സൌകര്യമുള്ള വീട്ടിലേക്ക് മാറുകയാണെന്ന് പറഞ്ഞ് പിന്നീട് പ്രീതി താമസം മാറുകയും ചെയ്‌തു. താമസിക്കാന്‍ സ്ഥലം ലഭിച്ചില്ലെന്ന് പറഞ്ഞ് ദിവസങ്ങള്‍ക്ക് മുമ്പ് പ്രീതി വീണ്ടും നളിനിയുടെ അടുത്തെത്തി.
തല്‍ക്കാലത്തേക്ക് താമസിക്കാന്‍ മുറി നല്‍കണമെന്ന പ്രീതിയുടെ ആവശ്യം നളിനി അംഗീകരിച്ചു. താമസം തുടങ്ങിയതിന് പിന്നാലെ പ്രീതിയുടെ അമ്മയും ഫ്ലാറ്റിലെത്തി താമസം ആരംഭിച്ചു. ഇതിനിടെ സ്വന്തം മാതാപിതാക്കള്‍ വീട്ടിലേക്ക് എത്തുമെന്ന് നളിനിക്ക് സന്ദേശം ലഭിച്ചു.
പ്രീതിയും അവരുടെ അമ്മയും കൂടെ താമസിക്കുന്നതിനാല്‍ വീട്ടില്‍ സൌകര്യമുണ്ടായിരുന്നില്ല. ഇതോടെ ഇവരോട് താമസം മാറണമെന്ന് നളിനി ആവശ്യപ്പെട്ടു. തുടര്‍ന്ന് തര്‍ക്കമുണ്ടാകുകയും യുവതിയും അമ്മയും ചേര്‍ന്ന് നളിനിയെ മര്‍ദ്ദിക്കുകയുമായിരുന്നു.
കഴിഞ്ഞ ആഴ്ച്ച ജിമ്മില്‍ പോകാനൊരുങ്ങി നിന്ന നളിനിയെ പ്രീതിയുടെ അമ്മ വീണ്ടും മര്‍ദ്ദിച്ചു. മോശം ഭാഷയില്‍ സംസാരിക്കുകയും ചെയ്‌തു. പ്രീതിയെ വിവരങ്ങള്‍ ധരിപ്പിക്കുന്നതിനിടെ നളിനിക്ക് വീണ്ടും മര്‍ദ്ദനം ഏറ്റുവാങ്ങേണ്ടി വന്നു. ഗ്ലാസ് ഉപയോഗിച്ചുള്ള ആക്രമണത്തില്‍ മുഖത്തും ശരീരത്തും മുറിവുകളും ചതവുകളും ഉണ്ടായി. ജീവനും കരിയറിനും പ്രീതിയും അമ്മയും ഭീഷണിയാകുമെന്ന് വ്യക്തമായതോടെ നളിനി പൊലീസില്‍ പരാതി നല്‍കുകയായിരുന്നു.
