ഉടൻ പൊട്ടിത്തെറിക്കും, വിമാനങ്ങൾക്ക് പിന്നാലെ 23 ഹോട്ടലുകൾക്ക് നേരെയും ബോംബ് ഭീഷണി

വിമാനങ്ങള്‍ക്ക് തുടര്‍ച്ചയായി ബോംബ് ഭീഷണി സന്ദേശം ലഭിക്കുന്നതിന് പിന്നാലെ 3 സംസ്ഥാനങ്ങളിലെ 23 ഹോട്ടലുകള്‍ക്ക് നേരെയും ബോംബ് ഭീഷണി. കൊല്‍ക്കത്ത, തിരുപ്പതി,രാജ്‌കോട്ട് എന്നിവിടങ്ങളിലെ ഹോട്ടലുകള്‍ക്കാണ് ബോംബ് ഭീഷണി സന്ദേശം ഇ മെയിലായി ലഭിച്ചത്.

 കൊല്‍ക്കത്തയിലെ പത്തോളം ഹോട്ടലുകള്‍ക്ക് നേരെ കഴിഞ്ഞ ദിവസമാണ് ഭീഷണി സന്ദേശം ലഭിച്ചത്. കേന്ദ്ര ആഭ്യന്തര മന്ത്രി അമിത് ഷാ സംസ്ഥാനത്ത് സന്ദര്‍ശനം നടത്തുന്ന ദിവസമായിരുന്നു ബോംബ് ഭീഷണി. പരിശോധനയില്‍ സംശയകരമായ ഒന്നും തന്നെ കണ്ടെത്താനായില്ല. നിങ്ങളുടെ ഹോട്ടലിലെ താഴത്തെ നിലയില്‍ ഒരു കറുത്ത ബാഗില്‍ ബോംബ് വെച്ചിട്ടുണ്ട്. അത് ഉടന്‍ തന്നെ പൊട്ടിത്തെറിക്കും എന്നായിരുന്നു ഭീഷണി സന്ദേശമെന്ന് പോലീസ് പറയുന്നു.

 തിരുപ്പതിയില്‍ 3 ഹോട്ടലുകള്‍ക്ക് നേരെയും രാജ്‌കോട്ടില്‍ 10 ഹോട്ടലുകള്‍ക്ക് നേരെയുമായിരുന്നു ബോംബ് ഭീഷണി. എന്നാല്‍ പരിശോധനയില്‍ ഒന്നും തന്നെ കണ്ടെത്താനായില്ല.