ഇന്ത്യയിലെ മിക്കയിടങ്ങളിലും കഴിഞ്ഞ 10 ദിവസത്തിനുള്ളില്‍ അഗ്നിബാധയുണ്ടായതായി നാസ. ഇത് തെളിയിക്കുന്ന ചിത്രങ്ങള്‍ നാസ പുറത്തുവിട്ടിരിക്കുകയാണ്.
ഉത്തരേന്ത്യയിലാണ് കൂടുതലായും അഗ്നിബാധ ഉണ്ടായത്. ഛത്തീസ്ഗഡ്, യുപി, മധ്യപ്രദേശ്, മഹാരാഷ്ട്ര എന്നിവിടങ്ങളില്‍ അഗ്നിബാധയുണ്ടായതായി ചിത്രങ്ങളില്‍ കാണുന്നു. അതുപോലെ തന്നെ തെക്കേയിന്ത്യയിലും ചിലയിടങ്ങളില്‍ അഗ്നിബാധയുണ്ടായി.
തീപിടുത്തമുണ്ടായ പ്രദേശങ്ങളെ നാസയുടെ ചിത്രങ്ങളില്‍ ചുവപ്പ് അടയാളത്തിലാണ് രേഖപ്പെടുത്തിയിരിക്കുന്നത്. കൂടുതലായും കൃഷിയിടങ്ങളിലാണ് അഗ്നിബാധയുണ്ടായതെന്നും നാസ ഗവേഷകര്‍ പറയുന്നു. കൃഷിയിടങ്ങളില്‍ യന്ത്രങ്ങള്‍ ഉപയോഗിച്ചുള്ള കൃഷിരീതിയാണ് ഇത്തരം തീപിടുത്തങ്ങളുടെ ഒരു പ്രധാന കാരണമായി നാസ ഗവേഷകര്‍ വിലയിരുത്തുന്നത്. എന്നാല്‍ ഇത് സ്ഥിരീകരിക്കപ്പെട്ടിട്ടില്ലെന്നും നാസ അറിയിക്കുന്നു.
വേനല്‍ക്കാലത്ത് രാജ്യമാകെ ഉണ്ടായിരിക്കുന്ന ഈ അഗ്നിബാധ ക്രമാതീതമായി താപനില ഉയരുന്നതിന് കാരണമായിട്ടുണ്ടെന്നാണ് വിലയിരുത്തല്‍.
