അഹമ്മദാബാദില്‍ തകര്‍ന്നുവീണ വിമാനത്തിന്റെ ബ്ലാക്ക് ബോക്‌സിന് തകരാര്‍; പരിശോധനയ്ക്കായി വിദേശത്തേക്ക് അയക്കും

ഇക്കാര്യത്തില്‍ കേന്ദ്രസര്‍ക്കാര്‍ അന്തിമ തീരുമാനം എടുക്കും.

അഹമ്മദാബാദില്‍ തകര്‍ന്നുവീണ വിമാനത്തിന്റെ ബ്ലാക്ക് ബോക്‌സിന് തകരാര്‍. പരിശോധനയ്ക്കായി ഇതിനെ വിദേശത്തേക്ക് അയക്കും. ദേശീയ മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തത്. ഇക്കാര്യത്തില്‍ കേന്ദ്രസര്‍ക്കാര്‍ അന്തിമ തീരുമാനം എടുക്കും. ബ്ലാക്ക് ബോക്‌സ് വാഷിംഗ്ടണ്‍ നാഷണല്‍ ട്രാന്‍സ്‌പോര്‍ട്ടേഷന്‍ സേഫ്റ്റി ബോര്‍ഡിലേക്ക് അയയ്ക്കുമെന്നാണ് സൂചന. അപകടത്തെ പറ്റിയുള്ള നിര്‍ണായക വിവരങ്ങള്‍ ബ്ലാക്ക് ബോക്‌സില്‍ നിന്നാണ് ലഭിക്കുക. 

വിമാനത്തിന്റെ ഉയരം, വേഗത, വോയിസ് റെക്കോര്‍ഡര്‍, ഫ്‌ലൈറ്റ് ഡേറ്റ റെക്കോര്‍ഡര്‍ തുടങ്ങിയവ ബ്ലാക്ക് ബോക്‌സിലാണ് ഉള്ളത്. വിമാനത്തിന്റെ വാല്‍ഭാഗത്താണ് ഈ ബോക്‌സുകള്‍ കാണപ്പെടുന്നത്. അതേസമയം വിമാന അപകടത്തില്‍ മരണപ്പെട്ടവരുടെ മുഴുവന്‍ ശരീരഭാഗങ്ങളും കണ്ടെത്തി നല്‍കുക എളുപ്പമല്ലെന്ന് അപകടത്തില്‍ പ്രത്യേകം നിയോഗിക്കപ്പെട്ട നോഡല്‍ ഓഫീസറായ ഗുജറാത്ത് കേഡറിലെ മലയാളി ഐഎഎസ് ഉദ്യോഗസ്ഥന്‍ അരവിന്ദ് വിജയന്‍ പറഞ്ഞു. ശരീരത്തോട് പറ്റിപ്പിടിച്ച് ഒരു നൂല്‍ ആണെങ്കിലും അത് ബന്ധുക്കള്‍ക്ക് നല്‍കുമെന്നും അദ്ദേഹം പറഞ്ഞു.

പ്രിയപ്പെട്ടവരുടെ കത്തിക്കരിഞ്ഞ ശരീരഭാഗങ്ങള്‍ സ്വീകരിക്കാന്‍ എത്തുന്നവരെ ആശ്വസിപ്പിക്കാന്‍ സൈക്കോളജിസ്റ്റുകളെവരെ അണിനിരത്തിയിട്ടുണ്ടെന്നും വളരെ വൈകാരികമായ ജോലിയാണ് ഏറ്റെടുത്തതെന്നും അദ്ദേഹം പറഞ്ഞു. അതേസമയം അഹമ്മദാബാദ് വിമാനാപകടത്തില്‍ 190 പേരുടെ മൃതദേഹം തിരിച്ചറിഞ്ഞു.