പ്രമുഖ ചലച്ചിത്രതാരവും മാണ്ഡ്യയിൽ നിന്നുള്ള സ്വതന്ത്ര്യ എം പിയുമായ സുമലത അംബരീഷ് ബിജെപിയിൽ ചേർന്നേക്കുമെന്ന് അഭ്യൂഹം. ബെംഗളുരു- മൈസൂരു എക്സ്പ്രസ് ഹൈവേയുടെ ഉദ്ഘാടനത്തിനായി മാർച്ച് 11ന് സംസ്ഥാനത്തെത്തുന്ന പ്രധാനമന്ത്രി നരേന്ദ്രമോദിയുടെ സാന്നിധ്യത്തിലാകും സുമലത ബിജെപിയിൽ ചേരുകയെന്നാണ് പുറത്തുവരുന്ന വിവരം.
ബിജെപി പ്രവേശനത്തെ പറ്റി പ്രതികരിക്കാൻ ഇതുവരെയും താരം തയ്യാറായിട്ടില്ല. 2019ലും സുമലത ബിജെപിയിൽ ചേരുമെന്ന് അഭ്യൂഹങ്ങളുണ്ടായിരുന്നു. കഴിഞ്ഞ ഡിസംബറിൽ ആഭ്യന്തരമന്ത്രി അമിത് ഷാ മാണ്ഡ്യയിലെത്തിയപ്പോഴും അഭ്യൂഹങ്ങൾ ശക്തമായിരുന്നു. അതേസമയം ബിജെപിയിലേക്ക് താരം എത്തുമെന്ന വാർത്തകൾ തള്ളികളയാനാകില്ലെന്ന് ബിജെപി വൃത്തങ്ങൾ പ്രതികരിച്ചു. ബിജെപി അധ്യക്ഷൻ ജെപി നഡ്ഡ നയിക്കുന്ന വിജയ സങ്കൽപ്പ യാത്ര മാണ്ഡ്യ കടക്കുമ്പോൾ ഇത് സംബന്ധിച്ച തീരുമാനമുണ്ടാകുമെന്നാണ് ബിജെപി കേന്ദ്രങ്ങൾ പറയുന്നത്.
