ന്യൂഡൽഹി: രാജ്യത്തെ വിവിധ സൈബർ തട്ടിപ്പുകളുമായി ബന്ധപ്പെട്ട് 1.4 ലക്ഷം മൊബൈൽ ഫോണുകൾ ബ്ലോക്ക് ചെയ്തു. ഫോണുകളുടെ ഐ.എം.ഇ.ഐ നമ്പറുകളാണ് ബ്ലോക്ക് ചെയ്യുക. ഇതോടെ മറ്റു സിം കാർഡുകൾ ഉപയോഗിച്ചാലും ഈ ഫോണുകൾ ഉപയോഗിക്കാൻ കഴിയില്ല.
കേന്ദ്ര ധനമന്ത്രാലയമാണ് ഇത് സംബന്ധിച്ച വിവരം പുറത്തുവിട്ടത്. പ്രതിബിംബ് എന്ന പുതിയ സാങ്കേതിക വിദ്യ ഉപയോഗിച്ചാണ് ഈ നടപടി തയ്യാറാക്കുന്നത്. ഇതനുസരിച്ചു തട്ടിപ്പുകാരുടെ ഫോൺ നമ്പറുകൾ പൊലീസിന് തത്സമയം നിരീക്ഷിക്കാൻ കഴിയും. ഇതനുസരിച്ചു അഞ്ഞൂറോളം അറസ്റ്റുകൾ നടന്നിട്ടുണ്ട്. ഇതിനൊപ്പം തട്ടിപ്പിന് ഉപയോഗിക്കുന്ന 3.08 ലക്ഷം സിം കാർഡുകളും വിലക്കാൻ കഴിഞ്ഞിട്ടുണ്ട്.
ഇതിനൊപ്പം പുതിയ നടപടി എന്ന നിലയ്ക്ക് സൈബർ തട്ടിപ്പുകൾ ഒരളവ് തടയുന്നതിനായി ധനമന്ത്രാലയത്തിന്റെ നേതൃത്വത്തിൽ വിവിധ മന്ത്രാലയങ്ങൾ, വകുപ്പുകൾ എന്നിവരുടെ യോഗം ചേർന്നിരുന്നു. ഇതനുസരിച്ചു വാണിജ്യ ആവശ്യങ്ങൾക്കായി ബാങ്കുകൾ, ധനകാര്യ സ്ഥാപനങ്ങൾ എന്നിവ സാധാരണ രീതിയിലുള്ള പത്ത് അക്ക മൊബൈൽ നമ്പറുകൾ ഉപയോഗിക്കുന്നത് അവസാനിപ്പിക്കണമെന്നും ഇതിനു പകരം 140 അടക്കമുള്ള സീരിയൽ നമ്പറുകൾ ഉപയോഗിക്കാനും ധനമന്ത്രാലയം നിർദേശിച്ചതായി വെളിപ്പെടുത്തി.
