ചൈനയിൽ നിന്ന് ഇന്ത്യക്കാരെ തിരിച്ചെത്തിക്കാനുള്ള രണ്ടാമത്തെ വിമാനം ഇന്ന് പുറപ്പെടുമെന്ന് എയർ ഇന്ത്യ. ഇന്ന് ഉച്ചയ്‌ക്ക് ശേഷമായിരിക്കും വിമാനം ചൈനയിലേക്ക് പുറപ്പെടുക. ആദ്യ വിമാനത്തിൽ ഇന്ന് രാവിലെ 324 ഇന്ത്യക്കാരെ തിരിച്ചെത്തിച്ചിരുന്നു. എന്നാൽ കടുത്ത പനിയുള്ള ആറുപേർക്ക് ചൈനയിൽ നിന്നും ഇന്ത്യയിലേക്ക് മടങ്ങാൻ സാധിച്ചിരുന്നില്ല.
അതേസമയം ചൈനയിൽ നിന്നും ഇന്ത്യയിലെത്തിയ 324 പേരെയും ഹരിയാനയിലെ മനേസറിലെ നിരീക്ഷണകേന്ദ്രത്തിലേക്ക് മാറ്റികൊണ്ടിരിക്കുകയാണ്. എന്നാൽ ഒരു മുറിക്കുള്ളിൽ നിരവധി പേരെ താമസിപ്പിക്കാനുള്ള സർക്കാർ നീക്കത്തിനെതിരെ വുഹാനിൽ നിന്നും തിരിച്ചെത്തുന്ന വിദ്യാർഥികൾ തന്നെ പ്രതിഷേധം അറിയിച്ചിട്ടുണ്ട്. കൂട്ടത്തിൽ ആർക്കെങ്കിലും കൊറോണ വൈറസ് ബാധയുണ്ടാവുകയാണെങ്കിൽ അത് വേഗത്തിൽ പടരുമെന്നാണ് ഇവരുടെ ആശങ്ക.
തിരിച്ചെത്തിയ ആദ്യ സംഘത്തിൽ 42 മലയാളികളും 56 ആന്ധ്രക്കാരും 53 തമിഴ്നാട്ടുകാരുമാണുള്ളത്. 324 പേരിൽ 90 പേർ സ്ത്രീകളാണ്. തിരിച്ചെത്തിയവരിൽ 211 വിദ്യാര്‍ഥികളും, 3 കുട്ടികളും എട്ട് കുടുംബങ്ങളും ഉള്‍പ്പെടുന്നു
