വിവാഹം കഴിക്കാന്‍ വിസമ്മതിച്ച സ്ത്രീയുടെ നഗ്നചിത്രങ്ങള്‍ ഭര്‍ത്താവിന് അയച്ചു; യുവാവ് പിടിയില്‍

തന്നെ വിവാഹം കഴിക്കാന്‍ വിസമ്മതിച്ച സ്ത്രീയുടെ നഗ്നദൃശ്യങ്ങള്‍ ഭര്‍ത്താവിനു അയച്ചുകൊടുത്ത് യുവാവ്. ഭോപ്പാലിലാണ് സംഭവം. മധ്യപ്രദേശ് പൊലീസ് യുവാവിനെ അറസ്റ്റ് ചെയ്തു. 

വിവാഹിതയായ സ്ത്രീയെ യുവാവ് പരിചയപ്പെടുന്നത് സാമൂഹ്യമാധ്യമങ്ങള്‍ വഴിയാണ്. ഇരുവരും അടുത്തു. സെക്‌സ്റ്റിങ്ങും വാട്‌സ്ആപ് വഴി വീഡിയോ കോളും ചെയ്തിരുന്നു. നഗ്നദൃശ്യങ്ങള്‍ യുവാവിനായി ഈ സ്ത്രീ കാണിച്ചുകൊടുത്തു. എന്നാല്‍, ഇതെല്ലാം യുവാവ് രഹസ്യമായി സ്‌ക്രീന്‍ റെക്കോര്‍ഡര്‍ വഴി ഡൗണ്‍ലോഡ് ചെയ്തിരുന്നു. 

തന്നെ വിവാഹം കഴിക്കണമെന്ന് യുവാവ് ഈ സ്ത്രീയോട് സ്ഥിരമായി ആവശ്യപ്പെടാന്‍ തുടങ്ങി. എന്നാല്‍, വിവാഹത്തിനു തനിക്ക് താല്‍പര്യമില്ലെന്ന് സ്ത്രീ പറയുകയായിരുന്നു. ഒടുവില്‍ നഗ്നവീഡിയോയും ചിത്രങ്ങളും ഭര്‍ത്താവിനും ബന്ധുക്കള്‍ക്കും അയച്ചുകൊടുക്കുമെന്ന് ഇയാള്‍ ഭീഷണിപ്പെടുത്തുകയായിരുന്നു. ഭര്‍ത്താവിനും മറ്റ് ബന്ധുക്കള്‍ക്കും വീഡിയോ അയച്ചുകൊടുക്കുകയും ചെയ്തു. 

സ്ത്രീയുടെ പരാതിയിലാണ് പൊലീസ് കേസെടുത്തത്. ഐടി ആക്ട് പ്രകാരം പ്രതിക്കെതിരെ കുറ്റങ്ങള്‍ ചുമത്തിയിട്ടുണ്ട്.