1947 ജൂലൈ22നാണ് കോൺസ്റ്റിറ്റ്യൂഷൻ അസംബ്ലി ഇന്ത്യയുടെ ദേശീയപതാകയായി നമ്മൾ ഇന്ന് കാണുന്ന ദേശീയപതാകയെ അംഗീകരിക്കുന്നത്. സ്വയം ഭരണ ഇന്ത്യയുടെ ദേശീയപതാകയായി 1947 ഓഗസ്റ്റ് 15 മുതൽ 1950 ജനുവരി 26 വരെയും അതിന് ശേഷം സ്വതന്ത്ര ഇന്ത്യയുടെ പതാകയായും ഇത് മാറി.
ഇന്ത്യൻ കരസേനയുടെ യുദ്ധപതാകയായും ഇന്ത്യൻ കരസേനയുടെ ദിവസേനയുള്ള സേനാവിന്യാസത്തിനും ഈ പതാക ഉപയോഗിക്കുന്നു. പതാകയുടെ പ്രദർശനവും ഉപയോഗവും ഇന്ത്യൻ പതാക നിയമപ്രകാരം കർശനമായി നടപ്പാക്കുന്നു. ഇന്ത്യൻ പതാക ഖാദി കൊണ്ട് മാത്രമെ നിർമിക്കാവു എന്ന് പതാകയുടെ ഔദ്യോഗിക നിയമങ്ങൾ അനുശാസിക്കുന്നു. 2002ൽ ഉണ്ടാക്കിയ ഇന്ത്യൻ പതാക നിയമം ദേശീയപതാകയുടെ പ്രദർശനത്തേയും ഉപയോഗത്തേയും നിയന്ത്രിക്കുന്നു.
ഔദ്യോഗിക പതാക ഭൂമിയോ ഹലമോ സ്പർശിക്കരുതാത്തതാകുന്നു. അതുപോലെ പതാക മേശവിരിയായോ വേദിക്ക് മുൻപിൽ തൂക്കുന്നതോ പ്രതിമകളെയോ ഫലകങ്ങളെയോ മൂടാനായോ ഉപയോഗിക്കുവാൻ പാടുള്ളതല്ല.2005 വരെ ദേശീയപതാക ആടയാഭരണങ്ങളുടെ ഭാഗമായോ യൂണിഫോമുകളുടെ ഭാഗമായോ ഉപയോഗിക്കാൻ കഴിയുമായിരുന്നില്ല. 2005ൽ ഇത് ഭരണഘടനഭേദഗതിയിലൂടെ മാറ്റം വരുത്തി. എന്നിരുന്നാലും അരയ്ക്ക് താഴെയുള്ള വസ്ത്രങ്ങളുടെ ഭാഗമായോ അടിവസ്ത്രമാായോ തലയിണകളിലോ തൂവാലകളിലോ ദേശീയപതാക തുന്നിചേർക്കാൻ പാടുള്ളതല്ല.
പതാക തുറസ്സായ സ്ഥലത്ത് കാലാവസ്ഥ എന്ത് തന്നെയായാലും പുലർന്നതിന് ശേഷം ഉയർത്തേണ്ടതും അസ്തമയത്തിന് മുൻപേ താഴ്ത്തേണ്ടതുമാണ്. ചില പ്രത്യേകസാഹചര്യങ്ങളിൽ മാത്രം.പൊതുമന്ദിരങ്ങൾക്കുമുകളിൽ രാത്രിയും പതാക പ്രദർശിപ്പിക്കാവുന്നതാണ്‌. തലകീഴായ രീതിയിൽ പതാകയോ അതിന്റെ ചിത്രമോ തന്നെ പ്രദർശിപ്പിക്കരുതാത്തതാകുന്നു. അഴുക്കുപുരണ്ടതോ കീറി പറിഞ്ഞതോ ആയ രീതിയിൽ പതാക പ്രദർശിപ്പിക്കുന്നതും അതിനെ അവഹേളിക്കുന്നതിന് സമമാണ്.
