അഭ്യൂഹങ്ങൾക്ക് വിരാമം; വിജയ് രൂപാണി തന്നെ ഗുജറാത്ത് മുഖ്യമന്ത്രി, നിധിൻ പട്ടേൽ ഉപമുഖ്യമന്ത്രിയും
വിജയ് രൂപാണി തന്നെ മുഖ്യമന്ത്രി
വിജയ് രൂപാണിയെ ഗുജറാത്ത് മുഖ്യമന്ത്രിയായി തിരഞ്ഞെടുത്തു. നിധിൻ പട്ടേൽ ഉപമുഖ്യമന്ത്രിയായും തുടരും. കേന്ദ്രമന്ത്രി അരുൺ ജയ്റ്റ്ലി, ബിജെപി ദേശീയ ജനറൽ സെക്രട്ടറി സരോജ് പാണ്ഡെ തുടങ്ങിയവരുടെ നേതൃത്വത്തിൽ ഗാന്ധിനഗറിൽ ചേർന്ന ബിജെപി നിയമസഭാകക്ഷി യോഗത്തിലാണ് അന്തിമ തീരുമാനമുണ്ടായത്.
കേന്ദ്രമന്ത്രി സ്മൃതി ഇറാനി ഉൾപ്പെടെയുള്ള പ്രമുഖരെ മറികടന്നാണ് രൂപാണി വീണ്ടും മുഖ്യമന്ത്രിയാകുന്നത്. വാശിയേറിയ പോരാട്ടത്തിനൊടുവിൽ കോൺഗ്രസിനെ മറികടന്ന് തുടർച്ചയായ ആറാം തവണയാണ് ഗുജറാത്തിൽ ബിജെപി അധികാരത്തിലെത്തുന്നത്.
ഗുജറാത്തിൽ ഇത്തവണ ബിജെപിക്കു സീറ്റുകൾ കുറഞ്ഞ സാഹചര്യത്തിൽ രൂപാണിയെ മാറ്റി പുതിയ മുഖ്യമന്ത്രി വരുമെന്ന് നേരത്തെ അഭ്യൂഹങ്ങൾ ഉണ്ടായിരുന്നു. ഇതെല്ലാം തള്ളിക്കൊണ്ടാണ് വിജയ് രൂപാണിയെ തന്നെ വീണ്ടും മുഖ്യമന്ത്രിയാക്കാൻ പാർട്ടി തീരുമാനിച്ചത്.
