125 കോടി ജനങ്ങളാണ് ബിജെപിയുടെ ഹൈക്കമാന്‍ഡെന്ന് പ്രധാനമന്ത്രി; രാഹുലിന്റെ കിരീടധാരണം ഔറംഗസേബിന്റെ ഭരണം പോലെ
ഷാജഹാനു ശേഷം ഔറംഗസേബ് തന്നെ; രാഹുലിനെ പരിഹസിച്ച് മോദി
രാഹുല്‍ ഗാന്ധിക്ക് നേരെ പരിഹാസവുമായി പ്രധാനമന്ത്രി നരേന്ദ്ര മോദി. കോൺഗ്രസ് അധ്യക്ഷ സ്ഥാനത്തേക്ക് നാമനിർദേശ പത്രിക സമർപ്പിച്ചതിനാണ് കോൺഗ്രസ് ഉപാധ്യക്ഷനെ പരിഹസിച്ച് മോദി രംഗത്തെത്തിയത്. ഔറംഗസേബിന്റെ ഭരണം പോലെയാണ് രാഹുലിന്റെ കിരീടധാരണമെന്നായിരുന്നു മോദിയുടെ പരിഹാസം.
മുഗള്‍ ഭരണകാലത്ത് ഷാജഹാനുശേഷം അദ്ദേഹത്തിന്റെ മകനായ ഔറംഗസേബ് വന്നതുപോലെയാണ് രാഹുല്‍ ഗാന്ധി കോണ്‍ഗ്രസ് അധ്യക്ഷനാകുന്നതെന്നും മോദി പറഞ്ഞു. തങ്ങളുടേത് ഒരു കുടുംബ പാർട്ടിയാണെന്ന കാര്യം കോൺഗ്രസ് തന്നെ അംഗീകരിക്കുന്നു എന്നാണ് ഇതില്‍ നിന്നും മനസിലാകുന്നതെന്നും മോദി പറയുന്നു. അതുകൊണ്ടുതന്നെ ഈ ഔറംഗസേബ് ഭരണം നമുക്ക് വേണ്ട എന്നും മോദി വ്യക്തമാക്കി.
ബിജെപിയുടെ ഹൈക്കമാന്‍ഡ് എന്നത് 125 കോടി ജനങ്ങളാണെന്നും മോദി അഭിപ്രായപ്പെട്ടു. ഗുജറാത്തിലെ വല്‍സദില്‍ തെരഞ്ഞെടുപ്പ് റാലിയില്‍ സംസാരിക്കവെയാണ് മോദി ഇക്കാര്യം പറഞ്ഞത്.
