സ്റ്റൈല്‍ മന്നന്‍ ആരാധകരെ കാണാനൊരുങ്ങുന്നു; സുപ്രധാന പ്രഖ്യാപനം ഉടന്‍ ഉണ്ടാകുമെന്ന് സൂചന

രാഷ്ട്രീയ പ്രവേശന അഭ്യൂഹങ്ങള്‍ ചൂടുപിടിക്കുന്നു; രജനി ആരാധകരെ കാണാനൊരുങ്ങുന്നു

രാഷ്ട്രീയ പ്രവേശനവുമായി ബന്ധപ്പെട്ട ചര്‍ച്ചകള്‍ ചൂടുപിടിക്കുന്നതിനിടെ സൂപ്പര്‍ സ്റ്റാര്‍ രജനീകാന്ത് വീണ്ടും ആരാധകരുമായി കൂടിക്കാഴ്ചയ്‌ക്കൊരുങ്ങുന്നു. ഡിസംബര്‍ 26 മുതല്‍ 31 വരെ കോടമ്പാക്കത്തുള്ള രാഘവേന്ദ്ര കല്യാണ മണ്ഡപത്തില്‍ വെച്ചായിരിക്കും രജനികാന്ത് ആരാധകരെ കാണുകയെന്നും രാവിലെ എട്ടു മുതല്‍ ഉച്ചതിരിഞ്ഞ് മൂന്നുവരെയാണ് കൂടിക്കാഴ്ചയെന്നുമാണ് പുറത്തുവരുന്ന റിപ്പോര്‍ട്ട്. 

ഡിസംബര്‍ 12ന് തന്റെ പിറന്നാള്‍ ദിനത്തില്‍ രജനികാന്തിന്റെ രാഷ്ട്രീയ പ്രവേശനം സാധ്യമാകുമെന്നായിരുന്നു ആരാധകര്‍ കണക്കുകൂട്ടിയത്. എന്നാല്‍ അന്ന് ആരാധകരെ കാണാന്‍ അദ്ദേഹം സമ്മതിച്ചില്ല. നേരത്തേ മേയില്‍ അദ്ദേഹം സമാനമായ കൂടിക്കാഴ്ച നടത്തിയിരുന്നു. അന്ന് അദ്ദേഹം രാഷ്ട്രീയ പ്രവേശനത്തിനുള്ള സൂചന നല്‍കുകയും ചെയ്തിരുന്നു.  

‘ദൈവഹിതമുണ്ടെങ്കില്‍ താന്‍ രാഷ്ട്രീയത്തിലേക്കെത്തുമെന്നും അത് ആര്‍ക്കും തടയാന്‍ സാധിക്കില്ലെന്നു’മായിരുന്നു രജനി വ്യക്തമാക്കിയത്. ‘യുദ്ധം വരുമ്പോള്‍ നമുക്ക് ഒരുമിക്കാ’മെന്ന് പറഞ്ഞായിരുന്നു അന്നത്തെ സംഗമം അവസാനിപ്പിച്ചത്. ഇതില്‍നിന്ന് അദ്ദേഹം രാഷ്ട്രീയത്തില്‍ കടന്നുവരുമെന്നാണ് വിലയിരുത്തപ്പെട്ടിരുന്നത്. എന്നാല്‍ ഇനിയും രജനിയുടെ യഥാര്‍ഥ മനസ്സിലിരുപ്പ് പുറത്തു വന്നിട്ടില്ല.