ശ്രീദേവിയുടെ മൃതദേഹം മുംബൈയിലെത്തിച്ചു; സംസ്കാരം ഇന്ന്, അന്ത്യാഞ്ജലി അർപ്പിക്കാൻ ആയിരങ്ങൾ ഒഴുകിയെത്തുന്നു

പ്രിയനടിയെ ഒരു നോക്ക് കാണാൻ...

ശനിയാഴ്ച രാത്രി ദുബായിൽ അന്തരിച്ച നടി ശ്രീദേവിയുടെ സംസ്കാരം ഇന്ന്. ഇന്നലെ രാത്രിയോടെയാണ് മൃതദേഹം മുംബൈയിലെ സ്വവസതിയിൽ എത്തിച്ചത്. താരത്തിന്റെ മൃതദേഹം മുംബൈയിൽ എത്തിച്ചതും ആയിരങ്ങളാണ് ഒഴുകിയെത്തിയത്. പ്രിയനടിയെ അവസാനമായി ഒന്ന് കാണുക എന്നതാണ് ഇവരുടെ ആവശ്യം. 

ഇന്നലെ രാത്രി 9.30 ഓടെ കുടുംബസുഹൃത്ത് അനിൽ അംബാനിയുടെ പ്രത്യേകവിമാനത്തിലാണ് ശ്രീദേവിയുടെ മൃതദേഹമെത്തിച്ചത്. ഏറെ അഭ്യൂഹങ്ങൾക്കും അനിശ്ചിതത്വങ്ങൾക്കുമൊടു‌വിലാണ് ദുബായ് പൊലീസ് മൃതദേഹം വിട്ടു നൽകിയത്. 

ഇന്നു രാവിലെ 9.30 മുതൽ 12.30 വരെ ലോഖണ്ഡ്‌വാല ഗ്രീൻ ഏക്കേഴ്സ് സമുച്ചയത്തിലെ സെലിബ്രേഷൻ സ്പോർട്സ് ക്ലബ് അങ്കണത്തിൽ മൃതദേഹം പൊതുദർശനത്തിനു വയ്ക്കും. ഇവിടെ അനുശോചന സമ്മേളനവും നടത്തും. രണ്ടോടെ വിലാപയാത്ര ആരംഭിക്കും. ഇന്ന് വൈകിട്ടാണ് സംസ്കാരം. 

ശ്രീദേവിയുടെ ഭർത്താവ് ബോണി കപൂറിന്റെ സഹോദരൻ അനിൽ കപൂർ, ശ്രീദേവിയുടെ മക്കളായ ജാൻവി, ഖുഷി എന്നിവരാണു വിമാനത്താവളത്തിലെത്തി മൃതദേഹം ഏറ്റുവാങ്ങിയത്.