പൊലീസ് തല തല്ലിപ്പൊട്ടിച്ചെന്ന് ബിജെപി നേതാവ്; കല്ലുകൊണ്ട് സ്വയം തല പൊട്ടിക്കുന്ന എംഎല്‍എയുടെ വീഡിയോ പുറത്തുവിട്ട് പൊലീസ്

ജുമെറത് ബസാറില്‍ റാണി അവന്തി ഭായി ലോധിന്റെ പ്രതിമ സ്ഥാപിക്കുന്നതിനിടെയാണ് സംഭവമുണ്ടായത്.

പൊലീസിന്റെ ആക്രമണത്തില്‍ പരിക്കേറ്റെന്ന ബിജെപി എംഎല്‍എയുടെ ആരോപണം കള്ളമെന്ന് തെളിയിച്ച് പൊലീസ്. എംഎല്‍എ സ്വയം തല തല്ലിപ്പൊട്ടിക്കുന്നതിന്റെ വീഡിയോ പൊലീസ് പുറത്തുവിട്ടു. ഹൈദരാബാദിലെ ഗോശാമഹല്‍ എംഎല്‍എയായ ടി രാജാ സിംഗിന്റെ ആരോപണങ്ങളാണ് പൊലീസ് വീഡിയോ പുറത്തുവിട്ട് പൊളിച്ചത്.

ജുമെറത് ബസാറില്‍ റാണി അവന്തി ഭായി ലോധിന്റെ പ്രതിമ സ്ഥാപിക്കുന്നതിനിടെയാണ് സംഭവമുണ്ടായത്. കോര്‍പറേഷന്റെ അനുമതിയില്ലാതെ പ്രതിമ സ്ഥാപിക്കാനുള്ള നീക്കം പൊലീസ് തടഞ്ഞതോടെ സംഘര്‍ഷം ഉടലെടുക്കുകയായിരുന്നു. ഇതിനിടെ പൊലീസ് തന്നെ ആക്രമിച്ചുവെന്നാണ് രാജയുടെ ആരോപണം. ഇത് കള്ളമാണെന്ന് തെളിയിക്കുന്നതാണ് പൊലീസ് പുറത്തുവിട്ട വീഡിയോ.

രാജ കല്ലുകൊണ്ട് സ്വയം തലയ്ക്ക് ഇടിക്കുന്നതും പൊലീസ് ഇയാളെ തടയാന്‍ ശ്രമിക്കുന്നതുമാണ് വീഡിയോയിലുള്ളത്. എംഎല്‍എയെ അക്രമിക്കുകയോ ലാത്തിച്ചാര്‍ജ് നടത്തുകയോ ചെയ്തിട്ടില്ലെന്ന് പൊലീസ് വ്യക്തമാക്കി. എംഎല്‍എയാണ് പൊലീസുകാരെ കയ്യേറ്റം ചെയ്യാന്‍ ശ്രമിച്ചതെന്നും പൊലീസ് പറയുന്നു.