വിരാട് കോലിയുടെ കടുത്ത ആരാധകന്‍; ആര്‍സിബിയുടെ വിജയത്തില്‍ ആഹ്ലാദിച്ച 25കാരന്‍ ഹൃദയാഘാതം മൂലം മരിച്ചു

അതേസമയം മൂഡലഗി താലൂക്കിലെ അവരാഡി ഗ്രാമത്തില്‍ ആഘോഷത്തിനിടെ ഒരു ആരാധകന്‍ ഹൃദയാഘാതം മൂലം മരിച്ചതായി റിപ്പോര്‍ട്ടുകള്‍ വരുന്നു.

റോയല്‍ ചലഞ്ചേഴ്സ് ബാംഗ്ലൂരിന്റെ (ആര്‍സിബി) ചരിത്രപരമായ ആദ്യ ഐപിഎല്‍ ചാമ്പ്യന്‍ഷിപ്പ് വിജയത്തിന് പിന്നാലെ, ബെംഗളൂരു ഉള്‍പ്പെടെ സംസ്ഥാനമെമ്പാടുമുള്ള ആരാധകര്‍ ആഘോഷങ്ങളില്‍ മുഴുകി. അതേസമയം മൂഡലഗി താലൂക്കിലെ അവരാഡി ഗ്രാമത്തില്‍ ആഘോഷത്തിനിടെ ഒരു ആരാധകന്‍ ഹൃദയാഘാതം മൂലം മരിച്ചതായി റിപ്പോര്‍ട്ടുകള്‍ വരുന്നു. 

മരിച്ചയാള്‍ 25 വയസ്സുള്ള മഞ്ജുനാഥ് കമ്പാര്‍ ആണെന്ന് തിരിച്ചറിഞ്ഞിട്ടുണ്ട്. ആര്‍സിബിയുടെയും വിരാട് കോഹ്ലിയുടെയും കടുത്ത ആരാധകനായ മഞ്ജുനാഥ് വിജയാഘോഷത്തില്‍ നൃത്തം ചെയ്ത് സന്തോഷിക്കുന്നതിനിടെ പെട്ടെന്ന് ഹൃദയാഘാതം സംഭവിക്കുകയായിരുന്നു. ദാരുണമായ സംഭവം അവരാഡി ഗ്രാമത്തെ വളരെയധികം ദുഃഖത്തിലാക്കിയിട്ടുണ്ട്. 

മഞ്ജുനാഥിന്റെ സംസ്‌കാരം ഇന്ന് ഉച്ചയ്ക്ക് 12 മണിക്ക് ഗ്രാമത്തില്‍ നടന്നു. മരണത്തില്‍ നാട്ടുകാരും ആര്‍സിബി ആരാധകരും ദുഃഖം രേഖപ്പെടുത്തി.