‘ഇത് ക്ഷേത്രമാണ് പള്ളിയല്ല’; രാഹുല്‍ഗാന്ധിയുടെ ക്ഷേത്രസന്ദര്‍ശനത്തിനെതിരെ യോഗി ആദിത്യനാഥ്
രാഹുല്‍ഗാന്ധിയുടെ ക്ഷേത്രസന്ദര്‍ശനത്തിനെതിരെ യോഗി ആദിത്യനാഥ്
കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയുടെ ക്ഷേത്ര സന്ദര്‍ശനത്തെ വിമര്‍ശിച്ച് യോഗി ആദിത്യനാഥ്. പള്ളിയില്‍ നിസ്‌കരിക്കാന്‍ ഇരിക്കുന്നതുപോലെ അമ്പലത്തില്‍ ഇരുന്നെന്നും അതിന് രാഹുലിനെ പൂജാരി ശാസിച്ചെന്നുമാണ് യോഗിയുടെ വര്‍ഗീയ പരാമര്‍ശം. ഗുജറാത്തില്‍ ബിജെപിയുടെ ഗൗരവ് യാത്രയെ അഭിസംബോധന ചെയ്തു സൂറത്തില്‍ സംസാരിക്കുകയായിരുന്നു അദ്ദേഹം.
ലോക്‌സഭാ തെരഞ്ഞെടുപ്പിന് മുമ്പ് രാഹുല്‍ ഗാന്ധി കാശി വിശ്വനാഥ് ക്ഷേത്രം സന്ദര്‍ശിച്ചു. ക്ഷേത്ര പൂജാരി അദ്ദേഹത്തോട് ഇരിക്കാന്‍ ആവശ്യപ്പെട്ടു. നിസ്‌കരിക്കാന്‍ ഇരിക്കുംപോലെയാണ് രാഹുല്‍ ഗാന്ധി അമ്പലത്തില്‍ ഇരുന്നത്. ഇത് ക്ഷേത്രമാണ് പള്ളിയല്ലെന്ന് പറഞ്ഞ് പൂജാരി അദ്ദേഹത്തെ ശാസിച്ചുവെന്നാണ് യോഗിയുടെ പരാമര്‍ശം. രാഹുല്‍ ഗാന്ധിക്ക് ഹിന്ദു മതാചാരങ്ങളെക്കുറിച്ച് അറിയില്ലെന്ന് പറഞ്ഞാണ് യോഗി ഇതു പറഞ്ഞത്. കൃഷ്ണനെയും ശ്രീരാമനേയും വിശ്വസിക്കാത്തവരാണ് രാഹുലിന്റെ പാര്‍ട്ടിക്കാരെന്നും യോഗി പറഞ്ഞു.
