‘ബിജെപി സ്ഥാനാര്‍ത്ഥിയായി സ്വന്തം അച്ഛന്‍ മത്സരിച്ചാല്‍ പോലും ആരും വോട്ട് ചെയ്യില്ല’: ഹാര്‍ദിക് പട്ടേല്‍

അനുയായികള്‍ക്ക് വേണമെങ്കില്‍ കോണ്‍ഗ്രസ് ടിക്കറ്റില്‍ മത്സരിക്കാം: ഹാര്‍ദിക് പട്ടേല്‍

തന്നെ പിന്തുണയ്ക്കുന്നവരില്‍ ആര്‍ക്കെങ്കിലും കോണ്‍ഗ്രസ് ടിക്കറ്റില്‍ മത്സരിക്കണമെന്ന് ആഗ്രഹമുണ്ടെങ്കില്‍ അതിനെ താന്‍ പിന്തുണയ്ക്കുമെന്ന് പട്യാദാര്‍ നേതാവ് ഹാര്‍ദിക് പട്ടേല്‍. സ്വന്തം അച്ഛനാണ് ബിജെപിക്ക് വേണ്ടി മത്സരിക്കുന്നതെങ്കില്‍ പോലും ഒരാളും വോട്ട് ചെയ്യില്ല. കോണ്‍ഗ്രസ് മാത്രമാണ് സംസ്ഥാനത്തെ യഥാര്‍ത്ഥ ബദലെന്നും ഹാര്‍ദിക് പട്ടേല്‍ പറയുന്നു.

എബിപി ന്യൂസിനോട് സംസാരിക്കുകയായിരുന്നു അദ്ദേഹം‍. അതേസമയം കോണ്‍ഗ്രസ് നേതാവ് അശോക് ഗെഹലോട്ടുമായി കൂടിക്കാഴ്ച നടത്താനെത്തിയ തന്റെ സിസി ടിവി രംഗങ്ങള്‍ ചോര്‍ത്തിയ താജ് ഹോട്ടലിനെതിരെ കേസ് നല്‍കുമെന്നും ഹാര്‍ദിക് പട്ടേല്‍ പറഞ്ഞു.

സിസി ടിവി ദൃശ്യങ്ങള്‍ ചോര്‍ത്താനുള്ള ബിജെപിയുടെ തീരുമാനം ജനാധിപത്യത്തിനെതിരായ ആക്രമണമാണെന്നും അദ്ദേഹം വ്യക്തമാക്കി. കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയുമായി താന്‍ കൂടിക്കാഴ്ച നടത്തുന്നുണ്ടോയെന്ന് അറിയാന്‍ വേണ്ടിയായിരുന്നു ദൃശ്യങ്ങള്‍ ബിജെപി ചോര്‍ത്തിയതെന്നും അദ്ദേഹം പറഞ്ഞു. രാഹുല്‍ഗാന്ധിയെ താന്‍ കാണാന്‍ ഉദ്ദേശിച്ചിട്ടുണ്ടെങ്കില്‍ അത് ലോകത്തോട് പറയുമെന്നും ഹാര്‍ദിക്ക് വ്യക്തമാക്കി.