ഇത് ചരിത്രം; ഏഷ്യന്‍ ഗെയിംസ് ബാഡ്മിന്റണിൽ സിന്ധുവിന് വെള്ളി

ഏഷ്യൻ ഗെയിംസിന്റെ പത്താം ദിനത്തിൽ നടന്ന ഏഷ്യന്‍ ഗെയിംസ് വനിതാ ബാഡ്മിന്റണില്‍ ഇന്ത്യന്‍ താരം പി വി സിന്ധുവിന് വെങ്കലം. ചരിത്രം കുറിച്ച് ഫൈനലിലെത്തിയ സിന്ധു പൊരുതിയത് ചൈനീസ് തായ്‌പേയുടെ തായ് സു യിങ്ങിനോടായിരുന്നു. സ്‌കോര്‍ 21-13, 21-16. നേരത്തെ ഇന്ത്യയുടെ മറ്റൊരു താരം സൈന നെഹ്‌വാള്‍ വെങ്കലം നേടിയിരുന്നു.

നേരിട്ടുള്ള സെറ്റുകൾക്കായിരുന്നു സിന്ധുവിന് തോൽവി. ലോക ഒന്നാം നമ്പര്‍ താരത്തിനെതിരേ ഒരിക്കല്‍ പോലും സിന്ധുവിന് പിടിച്ച് നില്‍ക്കാന്‍ കഴിഞ്ഞില്ല. ആദ്യ ഗെയിമിൽ 21-13 എന്ന സ്‌കോറും രണ്ടാം ഗെയിംസില്‍ ഇടവേളയ്ക്ക് പിരിയുമ്പോള്‍ സ്‌കോര്‍ 11-8 ആയിരുന്നു. ശേഷം തുടർച്ചയായ പോയിന്റുകൾ നേടി തായ് സ്വർണം ഉറപ്പിക്കുകയായിരുന്നു.

ഈ വർഷം ഒരു പ്രധാന ടൂർണമെന്റിൽ സിന്ധു നേരിടുന്ന അഞ്ചാമത്തെ തോൽവിയാണിത്. ഇന്ത്യ ഓപ്പൺ‍, കോമണ്‍വെല്‍ത്ത് ഗെയിംസ്, തായ്‌ലന്‍ഡ് ഓപ്പൺ‍, ലോക ബാഡ്മിന്റണ്‍ ചാംപ്യന്‍ഷിപ്പ് എന്നീ ടൂര്‍ണമെന്റുകളിലെ ഫൈനലുകളിലായിരുന്നു സിന്ധു തോൽവിയിലേക്കെത്തിയത്. ഈ ഫൈനലോടെ ജക്കാർത്തയിൽ എട്ടു സ്വർണവും 16 വെള്ളിയും 20 വെങ്കലവും ഉള്‍പ്പെടെ ഇന്ത്യയുടെ മെഡൽനേട്ടം 44 ആയി ഉയർന്നു.